Прыязджаць на свята ў Александрыю хочацца штогод. Здаецца, што ў мінулы раз усё прайшло настолькі крута, была прадстаўлена максімальна разнастайная, цікавая праграма для гасцей усіх узростаў: ад самых маленькіх да вельмі дарослых. І тым не менш, адправіўшыся сюды ўжо ў 2026-м годзе, зноў абышла ўсе падворкі, па традыцыі падгледзела, як дзяўчыны плятуць вянкі, не прапусціла дэгустацыю на ўнікальным фестывалі сыру... Карацей, засталася пад вялікім уражаннем ад маштабу і душэўнасці гэтага традыцыйнага летняга свята. І не толькі я!
Прыцягвае ветлівасць і дабрыня
Карына з Віцебскай вобласці на свята прыехала не ўпершыню, ды яшчэ і з усёй сям’ёй.
— Каб зарадзіцца настроем і творчасцю, паглядзець на людзей. Мы ўжо смачна паелі, прагуляліся па святочных пляцоўках, але ўсю прыгажосць усё роўна не абышлі! Прыедзем абавязкова яшчэ!
На пытанне аб тым, чаму свята карыстаецца папулярнасцю не толькі сярод беларусаў, але і гасцей нашай краіны, суразмоўніца адразу адказала так:
— На маю думку, таму што беларусы ўмеюць сябраваць і аб’ядноўваць іншых людзей. Да нас едуць з розных краін, таму што прыцягвае наша ветлівасць і дабрыня.
Адчуваю сябе як дома
Ірына прыехала ў Александрыю на свята з Калугі. Народны майстар Расіі не прапускае «Купалле» ў Беларусі з 2015 года:
— З таго часу кожны год я ў вас! З часам свята стала больш сучаснае.
Наогул, суразмоўніца аказалася ўжо добра знаёмая з нашай краінай.
— Падарожнічала ў Магілёў, які тут побач. Аднойчы яшчэ бывала ў Гомелі. І, вядома, у Мінску. Ваша і наша краіны вельмі падобныя, на мой погляд. Жыву сёлета ў адной з гасцініц у Магілёве. Учора, напрыклад, ішла па вуліцы да яе і заўважыла, што адчуваю сябе як дома. Падобныя дамы, падобныя нават дрэвы.
«Абавязкова прыеду яшчэ!»
Суразмоўніца Таццяна ў сваю чаргу ў Беларусі пабывала ўжо двойчы — сёлета і ў 2025-м. Яна жыве ў Ленінградскай вобласці Расіі.
— І краіна ваша мне вельмі падабаецца! Па-першае, людзі падобныя, вельмі лагодныя. Я заўважыла, што беларусы вельмі добра ставяцца да тых, хто прыязджае ў госці.
А ўласна "Купалле"ў параўнанні з мінулым годам стала больш маштабнае.
— І яшчэ больш маляўнічае. Усе падворкі Беларусі аформлены вельмі арыгінальна. Я абышла ўсе. З многімі майстрамі пазнаёмілася. Абавязкова прыеду яшчэ!
Яна ХМЯЛЬНІЦКАЯ
Фота аўтара
аг. Александрыя
