Шыны з абярэгам

Бабруйская «Белшына» — адно з вядучых прадпрыемстваў, дзе вырабляюцца шыны на любы густ. Два гады таму легкавыя радыяльныя шыны дзвюх мадэляў атрымалі Дзяржаўны знак якасці. Імі, у прыватнасці, камплектуюцца аўтамабілі BELGEE.

Разам з Юрыем РУСЕЦКІМ, дырэктарам завода масавых шын, дзе ствараюцца менавіта гэтыя мадэлі, адпраўляемся паназіраць за вытворчым працэсам. Наш гід — чалавек вопытны, амаль 30 гадоў прысвяціў гэтаму прадпрыемству. А пачынаў яшчэ слесарам-рамонтнікам.

— Кругласутачна тут працуюць 1540 чалавек, — уводзіць дырэктар у курс справы. — І кожны, пачынаючы ад праекціроўшчыка і заканчваючы кантралёрам, клапоціцца пра якасць прадукцыі. У самой вытворчасці задзейнічана больш за 800 відаў асноўнага абсталявання.

Юрый Русецкі звяртае ўвагу на шыны прэміяльнай серыі. Яны больш удасканаленыя, маюць павышаныя эксплуатацыйныя характарыстыкі. У афармленні іх бакавін прыменены беларускі арнамент і абярэгі. А на зімнія пратэктары нанесены зігзагападобныя палоскі, так званыя «слёзы Зеўса». Яны здольныя адводзіць бруд і снег, забяспечваючы ўстойлівасць у неспрыяльных пагодных умовах.

На сённяшні дзень «Белшына» прапануе спажыўцам больш за 360 мадэляў, звыш 200 з іх ствараюцца менавіта на заводзе масавых шын. Акрамя айчыннага рынку, прадукцыя ідзе ў Расію, краіны дальняй дугі, азіяцкія рэгіёны. За апошнія пяць гадоў у ходзе тэхпераўзбраення прадпрыемства асвоіла больш за 60 мадэляў шын. У распрацоўцы шыны для электрамабіляў — і гэта ўжо новыя гарызонты.

Нягледзячы на тое, што вытворчасць, на першы погляд, мужчынская, тут у ёй задзейнічана каля 30 % жанчын. Сярод іх — інжынер-тэхнолаг Надзея СМІРНОВА, якая правярае якасць шын:

— Дзякуючы аналізу мы дабіліся таго, што ўзровень браку складае ўсяго 0,01 % ад усяго аб’ёму выпускаемай прадукцыі.

Сістэма кантролю тут наогул вельмі сур’ёзная — пачынаючы ад праверкі ўваходнай сыравіны і заканчваючы гатовай прадукцыяй. На фінішы шыны правяраюцца не толькі на аўтаматызаваных лініях, але і на ўстаноўках рэнтгенадэфектаскапіі

У дапамогу аграрыям

Сельскагаспадарчая тэхніка, якая ствараецца кіруючай кампаніяй холдынга «Бабруйскаграмаш», дапамагае аграрыям дасягаць высокіх вынікаў. У ліку адзначаных Дзяржаўным знакам якасці — машына для ўнясення хімічных меліярантаў. Гэта тое, што дазваляе павысіць уласцівасць глебы, харчавання раслін, адпаведна, іх ураджайнасць. Цікавая акалічнасць: спачатку гэты від тэхнікі быў больш запатрабаваны ў Расіі, але пасля адзнакі яе высокай узнагародай інтарэс актыўна праявілі і мясцовыя спажыўцы.

— Ніхто раней не задумваўся, што ўгнаенні можна ўносіць больш дыферэнцавана, з вялікай дакладнасцю, і ў выніку атрымаць эканамічны эфект у выглядзе павышэння ўраджайнасці, — гаворыць генеральны дырэктар прадпрыемства Алег КОРСАК.

Сярод апошніх распрацовак прадпрыемства — камбінаваны прэс-падборшчык, створаны па даручэнні кіраўніка дзяржавы. Машына ўжо прайшла выпрабаванні і, паводле слоў Алега Корсака, не ўступае сусветным аналагам:

— Мы чакаем, што з нашым высокатэхналагічным прадуктам у наступныя гады асвоім не толькі ўнутраны рынак, але і выйдзем на замежныя.

Адзін з праектаў, якія цяпер рэалізуюцца на прадпрыемстве, — вытворчасць хадавых сістэм для машын высокай грузападымальнасці.

— Сёння ў сельскай гаспадарцы клас трактароў павышаецца. У асноўным эксплуатуюцца энерганасычаныя, а для іх неабходна высокатэхналагічная, вялікай танажнасці тэхніка, — удакладняе кіраўнік прадпрыемства. — На сёння ў нас маецца тэхніка з грузападымальнасцю звыш 30 тон, працуем над тым, каб загрузіць трактар у 40 конскіх сіл. Пад гэта патрэбныя і адпаведныя камплектуючыя — хадавыя сістэмы, восі. Трэба развіваць і наш камбінаваны прэс-падборшчык, будзем ствараць новую лінейку высокатэхналагічных машын па корманарыхтоўцы.

Алег Корсак асабіста правёў экскурсію па цэхах галоўнага корпуса, каб наглядна паказаць працэс стварэння тэхнікі. Ён звярнуў увагу на тое, што тут без адрыву ад вытворчасці вядзецца мадэрнізацыя. Побач з працуючым абсталяваннем рыхтуецца плошча пад новыя аўтаматычныя лініі.

Мэбля з густам

На ААТ «Ольса» была магчымасць убачыць, як з рулона стальной стужкі нараджаюцца камплектуючыя для прыгожай садовай і кэмпінгавай мэблі, па якой вытворцу добра ведаюць далёка за межамі краіны. Па выніках мінулага года Дзяржаўны знак якасці атрымалі яго садовыя арэлі «Александрыя».

— Вытворчасць гэтых арэляў, распрацаваных нашымі канструктарамі, пачалася яшчэ ў 2021 годзе, — расказвае дырэктар прадпрыемства Кацярына БАГДАНОВІЧ. — Пасля атрымання высокай узнагароды продаж іх у Беларусі павялічыўся ў два разы. За сезон мы вырабілі і рэалізавалі каля 4 тысяч сваіх арэляў.

У красавіку ў рамках рэалізацыі інвестыцыйнага імпартазамяшчальнага праекта прадпрыемства адкрыла цэх вытворчасці стальных электразварных труб і металаапрацоўкі. Яго агульная плошча — 4500 квадратных метраў, вытворчая магутнасць — больш за 7000 стальных электразварных халоднакатаных труб у год. Для прадпрыемства гэта новая імпартазамяшчальная прадукцыя, якую яно раней завозіла з Расіі, і асноўны від матэрыялу для вытворчасці тых жа арэляў.

— Новая вытворчасць дазволіла павысіць канкурэнтаздольнасць нашага канчатковага прадукту за кошт зніжэння сабекошту, — удакладняе дырэктар. — Разам з арганізацыяй вытворчасці трубнай прадукцыі мы ўкаранілі шэраг высокатэхналагічнага абсталявання для апрацоўкі металу. Тыя ж станкі лазернай рэзкі ліста і трубы. У выніку атрымалі эканамічны эфект у выглядзе зніжэння працаёмкасці і павышэння прадукцыйнасці працы. Для нас гэта важна, таму што мы экспартуем больш за 80 % прадукцыі і робім усё для таго, каб захоўваць лідзіруючыя пазіцыі па садовай мэблі на тэрыторыі рынку краін СНД.

Сёння «Ольса» пастаўляе сваю прадукцыю на рынкі 10 краін, у тым ліку ў Расію, Казахстан, Таджыкістан, Узбекістан, Азербайджан, Грузію, Манголію, наладжвае супрацоўніцтва з краінамі далёкай дугі.

Перспектыўны кірунак у рабоце прадпрыемства — вытворчасць медыцынскай мэблі. Цяпер праходзіць сертыфікацыю ложак з электрапрывадам, які будзе прымяняцца ў аддзяленнях інтэнсіўнай тэрапіі медыцынскіх устаноў.

Трымаць марку

У Дзяржкамітэце па стандартызацыі нагадалі, што высокая ўзнагарода прысуджаецца на два гады. На працягу гэтага часу прадпрыемства можа карыстацца ўсімі льготамі і прэферэнцыямі — наносіць знак якасці на сваю прадукцыю, маркіроўку і гэтак далей. Але гэта і вялікая адказнасць вытворцы. Атэстацыйная камісія пры неабходнасці можа прыехаць на прадпрыемства і ацаніць, як там забяспечваецца якасць, ці выконваюцца ўсе каноны і той тэхналагічны працэс, які пад гэту прадукцыю павінен быць.

Калі вытворца пажадае зноў намінавацца на атрыманне Дзяржаўнага знака якасці, ён павінен прадэманстраваць удасканаленне працэсу вытворчасці не менш чым на 30 %.

Бяспека, тэхналагічнасць, інавацыйнасць, экалагічнасць і эстэтычнасць — вось тыя крытэрыі, па якіх атэстацыйная камісія вызначае пераможцаў. Адбор сапраўды строгі, кожны з пяці крытэрыяў ацэньваецца па стабальнай шкале. За эстэтычнасць, дарэчы, балы ставяць спажыўцы. Сёлета ў галасаванні на эстэтычнасць таго ці іншага вырабу ўдзельнічала 42 500 спажыўцоў. Кожны з іх мог прагаласаваць толькі за адзін тавар. Без станоўчай адзнакі спажыўца 
выраб не зможа прэтэндаваць на перамогу.

Кампанія прысуджэння Дзяржаўнага знака якасці па выніках 2026 года ўжо выйшла на фінішную прамую. Сёлета на вышэйшую адзнаку якасці прэтэндуе каля 260 найменняў розных відаў прадукцыі ад 150 прадпрыемстваў. Каля 44 % — харчовая група, 33 % — тавары вытворча-тэхнічнага прызначэння і каля 23 % — тавары прамысловага прызначэння.

Нэлі ЗІГУЛЯ, фота аўтара і БелТА
Бабруйск — Магілёў