Госці і ўдзельнікі свята маюць магчымасць наведаць выставу сельскагаспадарчай прадукцыі прадпрыемстваў, пазнаёміцца з турыстычнымі і культурнымі брэндамі рэгіёна, экспазіцыямі да Года беларускай жанчыны.

У гарадскім парку для дзяцей і моладзі адкрылася некалькі новых пляцовак, у тым ліку спартыўная і гульнявая. Старадаўні парк у працэсе падрыхтоўкі да свята стаў больш добраўпарадкаваным і камфортным. Тут адрамантаваны пешаходныя дарожкі, з’явіліся новыя лаўкі. У горадзе звяртаюць на сябе ўвагу тэматычныя прыпынкі грамадскага транспарту. Абнавіліся і сацыяльныя аб’екты, сярод якіх раённы цэнтр сацыяльнага абслугоўвання насельніцтва, Шклоўская раённая цэнтральная бальніца.

Прыемна ўражвае і тое, што на вуліцах горада шмат моладзі. 

Сужэнцы Аня і Міша Прохаравы жывуць і працуюць у Шклове.

— У нас наогул шмат моладзі, — усміхаецца Ганна. — Мы ажаніліся ў 2009 годзе і з таго часу жывем на радзіме. Былі, дарэчы, прапановы з’ехаць, але мы не пажадалі. Гарадок невялікі, але ў нас усё ёсць. Цудоўны парк, дзіцячыя пляцоўкі, выдатная школа — нашы дзеці паўсюды паступаюць, выдатная дзіцячая школа мастацтваў. Нам вельмі падабаецца наш горад. Да свята ён стаў яшчэ больш прыгажэйшым.

Крысціна і Яўген таксама шклаўчане, але працуюць у Мінску. Разам з дачкой Багданай прыехалі ў адпачынак на радзіму. Плануюць правесці ў Шклове два тыдні. 

— Выдатна, маштабна, — падзяліліся яны сваімі ўражаннямі ад свята. — І хаця наша дзейнасць не звязаная з сельскай гаспадаркай, вельмі ганарымся дасягненнямі нашых аграрыяў.

— Як думаеце, Шклоў стане ў рэспубліцы горадам узорнага ўзроўню? — задаю правакацыйнае пытанне.

— Ён, мне падаецца, ужо на добрым узроўні, — кажа Яўген. — Вельмі прыгожы і ўтульны. І тут ёсць тое, чаго няма ў Мінску — спакой і цішыня. І дачцэ падабаецца. 

Нэлі ЗІГУЛЯ
Фота аўтара
Шклоў