У Мінску 10–12 лістапада 2026 года праходзіць трэці, фінальны этап рэспубліканскіх спаборніцтваў сярод дзяцей і падлеткаў па сучасным пяцібор’і «Дай пяць!». Арганізатарамі выступілі Міністэрствы адукацыі, спорту, Мінгарвыканкам, Прэзідэнцкі спартыўны клуб і Беларуская федэрацыя сучаснага пяцібор’я.

У фінале прымаюць удзел 168 прадстаўнікоў шасці рэгіёнаў Беларусі і Мінска, якія паказалі лепшыя вынікі ў першых двух этапах. Спаборніцтвы праходзяць у дзвюх узроставых групах: малодшай (2015–2016 г. н.) і старэйшай (2013–2014 г. н.).

Першы этап адбору ўключаў масавыя спаборніцтвы ў кожнай узроставай групе. Другі — абласныя і гарадскія старты па праграме лазер-ран, па выніках якіх быў сфарміраваны спіс удзельнікаў рэспубліканскага фіналу.

Сёння, 11 лістапада, адбылося ўрачыстае адкрыццё спаборніцтваў. У гэты ж дзень прайшоў лазер-ран, спрынт: хлопцы і дзяўчаты спаборнічалі ў бегу і стральбе. На здымках — кульмінацыйныя моманты гонак.

А заўтра, 12 лістапада, адбудуцца масавы старт і эстафеты, дзе можна будзе пабалець за сваіх, адчуць камандны дух, падтрымку трэнераў і балельшчыкаў.

Акрамя спартыўнай праграмы, для ўдзельнікаў і гасцей арганізаваны інтэрактыўныя спартыўна-забаўляльныя пляцоўкі, аўтограф-сесія ад імянітых пяціборцаў. Завершыцца фінал узнагароджаннем пераможцаў.

Спаборніцтвы праходзяць на пляцоўцы Рэспубліканскага цэнтра алімпійскай падрыхтоўкі па лёгкай атлетыцы (вул. Каліноўскага, 111, Мінск).

Надзея ЗУЕВА

Фота Валерыя КАРТУЛЯ