«Дажджы рознай інтэнсіўнасці папаўняюць запасы глебавай вільгаці. Плошчы з недастатковым увільгатненнем на тэрыторыі краіны скарачаюцца. Паводле даных назіранняў, на раніцу 18 жніўня добрае ўвільгатненне адзначаецца пераважна на захадзе і паўночным захадзе Беларусі. На значнай тэрыторыі паўднёва-ўсходняй паловы краіны яшчэ захоўваецца недахоп глебавай вільгаці — верхні 10-сантыметровы пласт застаецца па-ранейшаму слаба ўвільготнены або высушаны. Тут апрацоўка глебы пад сяўбу азімых збожжавых культур і азімага рапсу ўскладненая», — расказалі ў Белгідрамеце.

Па прагнозах аграметэаролагаў, у бліжэйшыя дні пад уплывам чаканых дажджоў забяспечанасць вільгаццю сельскагаспадарчых культур палепшыцца. Пры гэтым моцныя ападкі месцамі могуць прывесці да пераўвільгатнення глебы, што ўскладніць правядзенне палявых работ.