«Прадоўжыць фарміраваць належнае аблічча горада праз кожны будынак, кожны дом»

Работы на ўсіх аб’ектах вядуцца ў адпаведнасці з графікам, зацверджаным абласным штабам пад кіраўніцтвам старшыні Мінскага абласнога выканаўчага камітэта Аляксея КУШНАРЭНКІ. У студзені на першай рабочай сустрэчы штаба губернатар даў дакладнае даручэнне:

— Не будзем ісці па шляху найменшага супраціўлення. Калі мы сабраліся рабіць, то трэба рабіць капітальна, каб людзі адчулі.

А ў красавіку падчас інспекцыі ходу работ кіраўнік цэнтральнага рэгіёна акцэнтаваў увагу на функцыянальнасці і эстэтыцы:

— Цікавае рашэнне, але прастора павінна быць універсальнай: каб і дзеткам было дзе разгуляцца, і дарослым — прысесці на лавачку ў цені.

Пра тое, што сёлета «Дажынкі» пройдуць 19 верасня, Аляксей Кушнарэнка паведаміў на чарговым штабе па падрыхтоўцы да свята, які адбыўся ў сераду, 27 мая.

Пры абмеркаванні запланаваных работ кіраўнік цэнтральнага рэгіёна адзначыў, што неабходны комплексны план для паляпшэння гарадской інфраструктуры і добраўпарадкавання тэрыторыі Дзяржынска.

— Неабходна правесці інвентарызацыю аб’ектаў, прадоўжыць фарміраваць належнае аблічча горада праз кожны будынак, кожны дом, а таксама забяспечыць узаемадзеянне паміж рознымі ўстановамі і арганізацыямі ў пытаннях добраўпарадкавання. Неабходна ўлічваць стан кожнай дваровай тэрыторыі і падтрымліваць у належным стане ўжо тое, што прыведзена ў парадак. Важна, каб усе працавалі ўзгоднена, каб дасягнуць станоўчых вынікаў у добраўпарадкаванні горада, — падкрэсліў старшыня Мінскага аблвыканкама.

Рай для пешаходаў

Маштабная рэканструкцыя закранула цэнтральную плошчу, парк, жылыя дамы і сацыяльныя аб’екты горада. Адна з галоўных пераменаў, якую ўбачаць госці і жыхары, — поўная трансфармацыя цэнтральнай частцы горада. Тэрыторыя ад будынка райвыканкама да паркавай зоны стане адзінай пешаходнай прасторай. Рух аўтамабіляў тут будзе перакрыты, але прадугледзяць аб’язныя шляхі — транспарт пусцяць па кругавым руху па новай дарозе, якая пройдзе праз парк.

Цэнтральную плошчу пашыраць амаль на 45 % — гэта значыць, што адначасова назіраць за святочнай праграмай змогуць удвая больш гасцей. Тут жа з’явіцца фантан з падсветкай, новыя малыя архітэктурныя формы і зялёныя насаджэнні.

Парк, які меў патрэбу ў абнаўленні, чакаюць змены. Старыя і аварыйныя дрэвы прыбяруць, а на іх месца высадзяць маладыя. Частка атракцыёнаў дэмантуюць. Цалкам заменяць тратуарную плітку — новай выкладуць прагулачныя маршруты, ператварыўшы іх у сапраўдны ўзор.

Асаблівай увагі заслугоўвае помнік Феліксу Дзяржынскаму — ён будзе перанесены ў абноўленую паркавую прастору.

Да свята прывядуць у парадак 28 жылых дамоў. Фасады афарбуюць у адзіным стылі, а тры дамы і інтэрнат пройдуць капітальную рэнавацыю.

На некалькіх будынках з’явіцца серыя муралаў, прысвечаных гісторыі горада: Крутагор’е, Койданава, Дзяржынск — тры назвы аднаго горада ў розныя часы.

Да свята рэканструююць гарадскі стадыён, абновяць лазню, а таксама прылеглую тэрыторыю на вуліцы Набярэжнай.

Якія яшчэ чакаюць абнаўленні?

У горадзе з’явіцца 25 новых прыпынкаў.

Абновяць у Дзяржынску і камунікацыі: заменяць сеткі водазабеспячэння агульнай працягласцю больш за 10 кіламетраў, адрамантуюць самацёчную каналізацыю па вуліцах Карла Маркса і Мінскай, а па вечарах і ноччу ключавыя вуліцы горада будуць асвятляць энергаэфектыўныя святлодыёдныя свяцільні на новых апорах.

З’явіцца велапешаходная дарожка, якая злучыць мікрараёны Радужны і Крыніцы. Другі веламаршрут пабудуюць у напрамку аўтадарогі Дзяржынск — Ляхавічы — Плоскае.

Мясцовыя жыхары, далучайцеся!

Гарадскія ўлады прапануюць прадпрыемствам і арганізацыям прыняць удзел у конкурсе малых архітэктурных формаў, якія ўпрыгожаць вуліцы Дзяржынска. Далучыцца да акультурвання горада могуць і простыя гараджане — дастаткова навесці парадак на сваіх падворках.

Яна ВАЛАСАЧ
Фота: тэлеграм-канал «Минская область|О главном»