У рэспубліцы ажыятажу няма, цукровы рынак стабільны, тавара дастаткова. З красавіка 2022 года адпускныя цэны не мяняюцца. У краіне выбудавана дакладная сістэма: пачынаючы ад выдзялення зямель пад сяўбу цукровых буракоў і заканчваючы пытаннем цэнаўтварэння. На паліцах прадукт ёсць круглы год, хаця гадоў 15-20 таму былі часы, калі ў сезон нарыхтовак за цукрам выстройваліся чэргі.

Намеснік генеральнага дырэктара па камерцыйных пытаннях Слуцкага цукрарафінаднага камбіната Андрэй Гусак расказаў, што з 2018 года Беларусь не ўвозіць імпартны цукар-сырэц для перапрацоўкі. Увесь цукар атрымліваецца з айчыннай сыравіны — буракоў. «Слуцкі цукрарафінадны камбінат з’яўляецца буйнейшым вытворцам цукру ў Беларусі. Мы перапрацоўваем каля 12 тыс. т буракоў за суткі. Унутраны рынак поўнасцю застрахаваны, абаронены ад ваганняў сусветных цэн», — адзначыў ён.

Беларускія буракі паступаюць з палёў на аўтаматызаваныя лініі, дзе праходзіць поўны шлях ад мыцця і выварвання да цэнтрыфуг і ўпаковачных стужак.

Ураджай гэтага года перакрывае патрэбнасці краіны з лішкам. Чатыры айчынныя пляцоўкі ў Скідзелі, Гарадзеі, Жабінцы і Слуцку ў гэтым сезоне плануюць перапрацаваць звыш 5,5 млн т сабраных буракоў. На выхадзе атрымаецца больш за 700 тыс. т гатовага цукру пры ўнутранай патрэбнасці Беларусі прыкладна ў 350 тыс. т.

Намеснік старшыні канцэрна «Белдзяржхарчпрам» Ігар Груцо паведаміў, што па выніках 2026 года чакаецца экспарт цукру каля 400 тыс. т. «У той жа час мы назіраем няпростую сітуацыю на сусветных рынках. Адсочваем каціроўкі сусветных таварных біржаў. Яны паказваюць, што кошт цукру і цэны на яго выраслі больш як на 25%. Разам з тым магу смела запэўніць, што гэта ніякім чынам негатыўна не паўплывае на нашы пастаўкі на ўнутраны рынак, у тым ліку і ў плане цаны. Больш таго, ёсць добрыя перспектывы па выхадзе на новыя рынкі», — адзначыў ён.

У прыклад намеснік старшыні канцэрна прывёў Беларуска-мангольскім бізнес-форум, які праходзіў у Мінску, дзе заключаны кантракты на пастаўку беларускага цукру ў Манголію на суму больш за $4 млн.