Мерапрыемства праводзіцца пад эгідай Міністэрства замежных спраў Рэспублікі Беларусь. Канферэнцыя ўжо стала адной з вядомых міжнародных пляцовак для абмеркавання актуальных пытанняў рэгіянальнай і глабальнай стабільнасці.

У рабоце канферэнцыі прымуць удзел дэлегацыі больш як 40 дзяржаў і 7 міжнародных арганізацый. Сярод удзельнікаў — міністры замежных спраў, кіраўнікі інтэграцыйных аб’яднанняў, прадстаўнікі парламентаў, даследчых інстытутаў і аналітычных цэнтраў з Еўропы, Азіі, Блізкага Усходу.

У ліку ўдзельнікаў — міністр замежных спраў і знешняга гандлю Венгрыі Петэр Сіярта, міністр замежных спраў Расійскай Федэрацыі Сяргей Лаўроў, міністр замежных спраў Карэйскай Народна-Дэмакратычнай Рэспублікі Чвэ Сон Хі, саюзны міністр замежных спраў Рэспублікі Саюз М’янма Тан Свэ, спецыяльны пасланнік урада Кітайскай Народнай Рэспублікі па справах Еўразіі Сунь Ліньцзян, генеральны сакратар Арганізацыі Дагавора аб калектыўнай бяспецы Імангалі Тасмагамбетаў, генеральны сакратар Шанхайскай арганізацыі супрацоўніцтва Нурлан Ермекбаеў, генеральны сакратар нарады па ўзаемадзеянні і мерах даверу ў Азіі Кайрат Сарыбай, дзяржаўны сакратар Саюзнай дзяржавы Сяргей Глазьеў, намеснікі міністраў замежных спраў Ірана, Індыі, Камбоджы, Амана, ААЭ, Таджыкістана, дырэктар Цэнтра знешнепалітычных даследаванняў і міжнародных ініцыятыў пры МЗС Узбекістана.

Актыўны ўдзел прыме і экспертная супольнасць — больш за дзве сотні аналітыкаў, ваенных спецыялістаў, даследчыкаў з вядучых акадэмічных цэнтраў Беларусі, Аўстрыі, Азербайджана, Арменіі, В’етнама, Вялікабрытаніі, Казахстана, Кітая, Індыі, Расіі, Італіі, Іспаніі, Сербіі, ЗША, Швейцарыі, Швецыі, Фінляндыі, Узбекістана і шэрагу іншых. Сярод іх — генерал-маёр у адстаўцы Рагендра Сінгх Ядаў (Індыя), намеснік сакратара Савета Бяспекі Расійскай Федэрацыі Аляксей Шаўцоў, дырэктар Дэпартамента міжнароднага дыялогу Жэнеўскага цэнтра палітыкі бяспекі Аляксандра Матас, палітолаг Дытэр Райніш (Аўстрыя), прафесар паўднёва-ўсходняга ўніверсітэта Нарвегіі Глен Дзісен і іншыя.

Асноўная тэма канферэнцыі — «Глабальны сусветны (бес)парадак і галаваломка Еўразійскай бяспекі». Дыскусіі будуць сканцэнтраваны на аналізе ключавых тэндэнцый міжнародных адносін, выпрацоўцы падыходаў да фарміравання новай архітэктуры бяспекі, заснаванай на прынцыпах роўнасці, непадзельнасці і ўзаемнай павагі.

Асаблівая ўвага будзе нададзена дыялогу паміж Усходам і Захадам, умацаванню мер даверу і прадухіленню канфрантацыі.

Беларускі бок паслядоўна выступае за развіццё нейтральнай інклюзіўнай пляцоўкі, дзе прадстаўнікі розных дзяржаў і палітычных школ могуць адкрыта абменьвацца думкамі без ціску і прадузятых ацэнак. Мэта канферэнцыі — не дабіцца згоды любой цаной, а стварыць прастору, дзе можна быць пачутым, што сёння набывае асаблівую каштоўнасць ва ўмовах растучай міжнароднай турбулентнасці.

У рамках канферэнцыі запланаваны пленарнае пасяджэнне высокага ўзроўню, тэматычныя панэлі і экспертныя сайд-івэнты, прысвечаныя пытанням стратэгічнай стабільнасці, кантролю над узбраеннямі, рэгіянальнага ўзаемадзеяння, інфармацыйнай і эканамічнай бяспекі, міграцыйнай праблематыцы.

Мінская міжнародная канферэнцыя па еўразійскай бяспецы дэманструе ўстойлівую дынаміку развіцця. З кожным годам пашыраецца склад удзельнікаў, узмацняецца роля экспертнага вымярэння, узрастае цікавасць міжнародных арганізацый і даследчых структур.

Форум становіцца аўтарытэтнай пляцоўкай для прамога і прафесійнага абмену думкамі паміж Усходам і Захадам, якая спрыяе ўмацаванню даверу, бяспекі і стабільнасці ў Еўразіі і за яе межамі.