Французскі нападаючы Усман Дэмбеле прызнаны найлепшым футбалістам планеты сезона-2024/25 па версіі Міжнароднай федэрацыі футбола (ФІФА). Цырымонія ўручэння прэмій the Best прайшла ў катарскай Дохе, паведамляе БелТА.
У гэтым сезоне 28-гадовы форвард разам з таварышамі па «Пары Сен-Жэрмен» стаў пераможцам Лігі чэмпіёнаў, выйграў чэмпіянат, Кубак і Суперкубак Францыі. У 53 праведзеных матчах у складзе парыжскага клуба Усман Дэмбеле забіў 35 мячоў.
Прэмія the Best была заснавана ФІФА ў 2016 годзе. Лідар зборнай Аргенціны Ліянэль Месі тройчы станавіўся яе ўладальнікам (2019, 2022, 2023). Акрамя яго найлепшымі гульцамі свету па два разы прызнаваліся паляк Роберт Левандоўскі (2020, 2021) і партугалец Крышціяну Раналду (2016, 2017), у 2018 годзе прыз атрымаў харват Лука Модрыч, а год таму — бразілец Вінісіус Жуніёр.
Найлепшай футбалісткай планеты трэці раз запар стала лідар зборнай Іспаніі і «Барселоны» Айтана Бонмаці.
Найлепшым трэнерам мужчынскіх каманд названы іспанскі настаўнік «Пары Сен-Жэрмен» Луіс Энрыке, а ў жанчын узнагароды ўдастоена трэнер зборнай Англіі нідэрландка Сарына Вігман.
Сярод галкіпераў найлепшым стаў італьянец Джанлуіджы Донарума («Манчэстэр Сіці»).
Уладальнікам прыза «Справядлівай гульні» (Fair Play) стаў урач нямецкага клуба «Ян Рэгерсбург» Андрэас Харлас-Нойкінг, які падчас матчу выратаваў балельшчыка «Магдэбурга».
Прыза Ферэнца Пушкаша за самы прыгожы гол удастоены абаронца аргенцінскага «Індэпенд’ентэ» Сант’яга Манціэль. У жанчын аўтарам самага эфектнага гола стала мексіканка Лізбет Авалье.
