Значны аб’ект з’явіўся ў вёсцы Ляскоўка Бараўлянскага сельсавета, які з’яўляецца адным з самых буйных на тэрыторыі прысталічча. Сучасны фізкультурна-аздараўленчы комплекс урачыста расчыніў свае дзверы для прыхільнікаў здаровага ладу жыцця і прафесійных спартсменаў.

Старшыня Мінскага аблвыканкама Аляксей Кушнарэнка адзначыў, што адкрыццё ФАКа працягвае добрую традыцыю напярэдадні дзяржаўных свят уводзіць у строй важныя сацыяльныя аб’екты, што пацвярджае і сацыяльную арыентаванасць палітыкі нашай дзяржавы.

«Гэта перш за ўсё клопат пра людзей, павышэнне ўзроўню іх жыцця. У гэтым шматфункцыянальным будынку створаны ўсе ўмовы для заняткаў спортам і актыўнага адпачынку. Плаванне, гандбол, валейбол, міні-футбол, настольны тэніс, трэнажорная зала і зала для ўсходніх адзінаборстваў — кожны знойдзе для сябе адзін са спартыўных кірункаў», — падкрэсліў Аляксей Кушнарэнка, падзякаваўшы тым, хто адказваў за рэалізацыю праекта. 

У якасці падарунка да наваселля ён уручыў дырэктару комплексу Алене Ярмак сертыфікат на Br20 тыс. «Калектыў комплексу ўрачыста абяцае зрабіць усё для ўмацавання здароўя насельніцтва раёна», — адзначыла Алена Ярмак.

Комплекс мае выдатную базу як для аматараў фізкультуры, так і для тых, хто працуе на ніве вялікага спорту. Трохпавярховы спартыўны аб’ект уключае басейн на пяць дарожак па 25 м, дзіцячы басейн-ванну, для рэлаксу прадугледжана саўна з купеллю і джакузі. У яго структуры некалькі залаў: вялікі спартыўны для гульнявых відаў, залы для фітнесу і ўсходніх адзінаборстваў, трэнажорная і зала для тэніса, а таксама буфет з відэазонай для прагляду матчаў.

 

Акрамя гэтага, да ФАКу прылягае тэрыторыя плошчай 2 га, дзе размешчаны плоскасныя збудаванні ад гульнявых пляцовак са штучнай травой да пляцоўкі для варкаўта.

Комплекс у Ляскоўцы стане базай для правядзення трэніровачнага працэсу спартсменаў Мінскага абласнога гандбольнага клуба — як дарослых, так і выхаванцаў ДЮСШ. Як праходзіць трэніроўка ў хлопцаў і дзяўчат, змаглі ўбачыць і госці мерапрыемства.

«У жніўні 2023 года заснавальнікам гандбольнага клуба стаў Мінскі аблвыканкам. У той час у яго ўваходзіла жаночая гандбольная каманда „БНТУ-БЕЛАЗ“ і спартыўная школа. Штатная колькасць супрацоўнікаў і спартсменаў-інструктараў складала 35 чалавек. У 2024 годзе структура была пашыраная: у яе ўвайшлі не толькі жаночая каманда „БНТУ-БЕЛАЗ“ на чале з трэнерам, алімпійскім чэмпіёнам Канстанцінам Шараваравым, але і мужчынская каманда, а таксама фарм-каманда з гульцоў 2006 года нараджэння і маладзейшая, якая з’яўляецца рэзервам», — расказаў дырэктар Мінскага абласнога гандбольнага клуба Аляксандр Вяргейчык. 

За два гады гандбалісты вобласці дасягнулі значных вынікаў і перамог на чэмпіянатах. У іх ліку — Суперкубак Рэспублікі. «У дадзены момант толькі на базе школы займаюцца больш за 180 дзяцей. І ўдасканаленне спартыўнай базы, дзе мы можам трэніравацца, — залог росту спартсменаў», — падкрэсліў Аляксандр Вяргейчык.

У цяперашні час у Мінскай вобласці вядзецца будаўніцтва спартыўных аб’ектаў у Крупках, Нясвіжы, закладзены падмурак пад будучы ФАК у Заслаўі.