Намеснік кіраўніка горада Казані Яўгенія Лодвігава расказала аб насычанай праграме, падрыхтаванай для мінчан. «У мінулым годзе мы сустракалі цудоўны горад Мінск у Казані. Сёння прыехалі з візітам у адказ. Мінчан чакае цудоўная праграма. Мы прывезлі фестываль „Смачная Казань“, які з’яўляецца брэндам нашага горада. Лепшыя рэстаратары гатуюць цудоўныя татарскія стравы. Калі яшчэ не каштавалі эчпачмак, кыстыбый, бэліш, зур-бэліш, чак-чак, абавязкова прыходзьце», — запрасіла яна.

Асаблівую ўвагу арганізатары ўдзялілі дзецям. «Падрыхтаваны майстар-класы, дзе яны могуць паспрабаваць сябе ў татарскай мазаіцы», — адзначыла Яўгенія Лодвігава. Акрамя таго, на пляцоўцы разгорнуты кірмаш рамеснікаў, дзе праходзяць заняткі па чаканцы манет, вырабе нацыянальных упрыгажэнняў, размалёўцы вітражоў і паштовак, а таксама стварэнні магнітаў са скуры.

«Мы не маглі не ўзяць нашых татарскіх майстроў мастацтваў. Гэта, па-першае, знакаміты заслужаны ансамбль танца «Казань», заслужаная артыстка Рэспублікі Татарстан Эльміра Калімуліна і музычная група «Волга-Волга», — дадала намеснік мэра. Выступленні прадоўжацца ўсе тры дні і будуць праходзіць да 22.00.

Заўтра, 25 мая, у рамках Дзён Казані адбудзецца бізнес-форум «Казань і Мінск: пабрацімства — новы драйвер развіцця». «Прыедзе вялікая дэлегацыя, і будуць падпісаны сумесныя пагадненні. Сярод іх пагадненне паміж тэхнапаркамі — Казанскім і Мінскім, МАЗам і нашым прадпрыемствам, у сферах аховы здароўя і валанцёрскага руху», — расказала Яўгенія Лодвігава.

Чакаецца, што 25 мая фестывальную пляцоўку наведаюць старшыня Мінгарвыканкама Уладзімір Кухараў, раіс Татарстана Рустам Мініханаў і мэр Казані Ільсур Метшын.