Пра заўважаны ў паветры беспілотны лятальны апарат не лішнім будзе паведаміць у міліцыю, сказаў намеснік начальніка галоўнага ўпраўлення — начальнік упраўлення папярэдняга расследавання і прававога забеспячэння аператыўнай дзейнасці Дзяржпагранкамітэта Мікалай Барэйка на прэс-канферэнцыі «Аб пытаннях узмацнення аховы паветранай прасторы Рэспублікі Беларусь і выкарыстання беспілотных лятальных апаратаў у рамках заканадаўства», паведаміла БелТА.
Колькасць паведамленняў, якія паступаюць ад жыхароў краіны, аб заўважаных імі БПЛА пастаянна павялічваецца.
«Жыхары краіны, думаючы аб выкананні свайго грамадзянскага абавязку, лічаць важным інфармаваць праваахоўныя органы аб выяўленні БПЛА. Разам з тым сам факт знаходжання беспілотніка ў паветры не з’яўляецца правапарушэннем. Але дадзеныя паведамленні патрэбныя, і перш за ўсё для таго, каб звярнуць увагу на сам апарат і законнасць яго знаходжання ў паветранай прасторы. Частка такіх паведамленняў, як правіла, заканчваецца праверкай дакументаў і нічога не нясе для аператара і дзейнасці, якую ён ажыццяўляе», — расказаў начальнік упраўлення Узброеных Сіл па выкарыстанні паветранай прасторы Рэспублікі Беларусь Расціслаў Давідзюк.
Акрамя гэтага, па словах намесніка начальніка галоўнага ўпраўлення — начальніка ўпраўлення папярэдняга расследавання і прававога забеспячэння аператыўнай дзейнасці Дзяржпагранкамітэта Мікалая Барэйкі, пільнасць грамадзян прыносіць карысць і пагранічнай службе.
«Мы будзем вельмі ўдзячныя грамадзянам, калі яны будуць інфармаваць нас аб тым, што на пагранічнай тэрыторыі імі заўважаны БПЛА. Дадзеную інфармацыю лепш за ўсё адрасаваць на нумар 102», — падкрэсліў Мікалай Барэйка.
