Каманды сабраліся ў Мінску напярэдадні турніру і правялі трэніроўкі. Спаборніцкую праграму адкрылі хлопцы ва ўзроставай катэгорыі да 19 гадоў. Як расказаў трэнер калектыву з Сінявокай Вадзім Чудноўскі, першы этап Кубка Дружбы праходзіў у Расіі.

«Мы выступілі на ім больш паспяхова, чым год таму. У 2024-м амаль усе медалі ўзялі гаспадары, а цяпер мы зраўняліся з сапернікам па ўзнагародах. Думаю, дома хлопцы адпрацуюць яшчэ лепш — выступаем жа ў родных сценах. Падрыхтоўку спартсмены вялі з асабістымі трэнерамі ў сваіх рэгіёнах. Не буду з каманды кагосьці выдзяляць. Хацелася, каб тыя, хто выйграў медалі ў Расіі на першым этапе, паўтарылі вынікі і ў Мінску. Даказалі невыпадковасць сваіх поспехаў. У кожным відзе праграмы ў беларусаў па два прэтэндэнты на ўзнагароды», — расказаў В. Чудноўскі.

Паводле яго слоў, у беларускіх спартсменаў напярэдадні Кубка Дружбы не было залімітавага хвалявання. Большасць з іх выступалі на першынствах свету і Еўропы. Сапернікі прыехалі таксама моцныя. Канкурэнцыя за ўзнагароды рэальна высокая.

Адзначым, што басейн міжнароднага стандарту ўпершыню прымае спаборніцтвы па сучасным пяціборстве. Над падрыхтоўкай пляцовак працавала каманда і зрабіла ўсё па міжнародных правілах. Тут ёсць усё для трох відаў праграмы — абсталяваны фехтавальныя дарожкі, паласа перашкод і водныя дарожкі. Спаборніцтвы па лазер-ране пройдуць на стадыёне Беларускага дзяржаўнага ўніверсітэта фізічнай культуры. Дастаўку спартсменаў, трэнераў і суддзяў з басейна на пляцоўку арганізавалі трансферам. На працягу трох дзён удзельнікі разыграюць чатыры камплекты медалёў.

У аўторак, 15 ліпеня (пачатак — штодня ў 9:00) у барацьбу ўступяць дзяўчаты да 19 гадоў, а днём пазней наймацнейшых будуць выяўляць сярод юнакоў і дзяўчынак да 17 гадоў. Уваход для гледачоў вольны.