Вячэрнюю праграму першага дня спаборніцтваў адкрыў жаночы фінал у штурханні ядра. Удзел у турніры прынялі 11 расіянак і дзве беларускі. Лідар нашай каманды Алена Дубіцкая ў першай спробе адправіла снарад на 18,21 м — ніхто з саперніц так і не змог наблізіцца да гэтай адзнакі. Алена Трус заняла чацвёртае месца з кідком на 17,11 м, ад тройкі нашу спартсменку аддзялілі ўсяго 8 сантыметраў. Другі і трэці рэзультаты паказалі масквічка Алена Гардзеева (17,53 м) і Кацярына Бурмістрава з Санкт-Пецярбурга (17,19).

Раней у гэтым сезоне Алена Дубіцкая атрымала перамогі на Кубку мацнейшых спартсменаў і чэмпіянаце Беларусі ў Брэсце, Мемарыяле братоў Знаменскіх у Маскве, а таксама на камандным чэмпіянаце Расіі і ўсерасійскіх спаборніцтвах у Сочы.