Старшыня Савета Рэспублікі Нацыянальнага сходу Рэспублікі Беларусь Наталля Качанава, вітаючы ўдзельнікаў сёлетняга «Цягніка Памяці», адзначыла, што праект ужо стаў легендарным. 

— Таму што ён прыйшоўся па душы хлопцам і дзяўчатам, — удакладніла Наталля Іванаўна. — Мы бачым, які сёння конкурс для ўдзелу ў праекце. Калі мы з калегай, Валянцінай Іванаўнай (Матвіенка. — «Зв.»), абмяркоўвалі гэты праект, мы хваляваліся. Але праект адбыўся. 

Яго ідэя — гістарычная памяць, звярнула ўвагу Старшыня Савета Рэспублікі. 

— Гэтай памяці здраджваць нельга, — заклікала яна. — Яе трэба перадаваць з пакалення ў пакаленне, што робіце вы, рабяты, якія ўдзельнічаюць у гэтым праекце. Традыцыйна даём яму старт у горадзе Брэсце вось ужо пяты раз. Менавіта тут вераломна нямецка-фашысцкія захопнікі напалі на нашы землі, думаючы пра тое, што літаральна за гадзіны яны ўправяцца з Брэсцкай крэпасцю, але яна трымалася амаль месяц. Людзі розных нацыянальнасцяў абаранялі Брэсцкую крэпасць. Яны рабілі ўсё, каб не здацца ворагу. І наш народ перамог. Той народ, прадстаўнікі якога прысутнічаюць сёння тут.

Старэйшае пакаленне захавала для нас мір і свабоду, падкрэсліла Наталля Качанава. 

— І мы шчаслівыя таму, што вы праваднікі гэтай ідэі. Мы сустракаемся са школьнікамі-выпускнікамі папярэдніх праектаў. І сёння яны тут прысутнічаюць, у зале. Яны з гонарам гавораць: «Я — удзельнік «Цягніка Памяці». Мы, вядома, упэўненыя ў тым, што роўна так, як і тыя хлопцы і дзяўчаты, вы пасябруеце, будзеце камунікаваць адно з адным, зможаце пазнаёміцца з гісторыяй. 

Старшыня Савета Рэспублікі нагадала моладзі, што няма нічога больш каштоўнага, чым чалавечае жыццё і сяброўства паміж людзьмі.

Забыць гісторыю — вельмі небяспечна

Намеснік Старшыні Савета Федэрацыі Федэральнага Сходу Расійскай Федэрацыі Канстанцін Касачоў акцэнтаваў увагу на тым, што сёлета ў праекце «Цягнік Памяці» ўдзельнічаюць прадстаўнікі не толькі ўсіх рэспублік былога Савецкага Саюза, але і краін антыгітлераўскай кааліцыі.

— У найноўшай гісторыі мы не вельмі лёгка знаходзім адно аднаго. І адбываецца гэта, напэўна, таму, што ў многіх іншых краінах, якія калісьці былі разам, гэтую гісторыю пачалі забываць. І гэта вельмі небяспечна. Менавіта таму важна, каб гэту гісторыю не забылі мы. Каб гэту гісторыю не забылі вы, — звярнуўся Канстанцін Касачоў да ўдзельнікаў праекта.

Намеснік Старшыні Савета Федэрацыі Федэральнага Сходу Расійскай Федэрацыі заўважыў, што школьнікам трэба будзе перадаваць гісторыю сваім дзецям і наступным пакаленням.

— Праект «Цягнік Памяці» — гэта не толькі магчымасць дакрануцца да гісторыі той вайны (Вялікай Айчыннай. — «Зв».), не толькі магчымасць убачыць новыя месцы, надзвычайны шанц здабыць новую дружбу. Гэта яшчэ і адказнасць, якая ляжыць на вашых плячах. Мы давяраем вам. І чамусьці, мне здаецца, што мы ў вас не памыляемся, — падзяліўся меркаваннем Канстанцін Касачоў.

Захавальнікі праўды

Старшыня Брэсцкага аблвыканкама Пётр Пархомчык адзначыў сімвалізм таго, што праект стартуе менавіта з Брэсцкай зямлі. 

— Вы адчуеце, наколькі быў вялікі патрыятызм і гераізм савецкага салдата, які здзяйсняў гераічныя ўчынкі. «Вялікая Германія», уся Еўропа, якая дапамагала Германіі, прайграла вайну па сутнасці ў першы дзень — як толькі паспрабавала перайсці граніцу каля Брэсцкай крэпасці. І тут яны сустрэлі вельмі жорсткую барацьбу, супраціўленне за кожны ўчастак, за кожны кавалак сваёй зямлі. 

Я б хацеў, каб тыя хлопцы і дзяўчаты, якія сёння знаходзяцца ў зале, якія будуць удзельнічаць у мерапрыемствах, што будуць праводзіцца ў Брэсцкай крэпасці, сталі захавальнікамі той гістарычнай праўды, пра якую мы зараз гаворым. Каб вы расказвалі пра тыя трагічныя падзеі, якія адбыліся на нашай беларускай зямлі. І на іншых землях, дзе ішлі ваенныя падзеі.

Удзельнікі «Цягніка Памяці» гэтай ноччу — з 21 на 22 чэрвеня — наведаюць памятныя мерапрыемствы ў Брэсцкай крэпасці — месцы, якое адным з першых прыняло на сябе ўдар нямецка-фашысцкіх захопнікаў. Акрамя таго, іх наперадзе чакаюць два тыдні разнастайных экскурсій, сустрэч і знаёмстваў са знакавымі месцамі. Упэўнены, дамоў яны прывязуць мноства эмоцый і ўсведамленне, што мінулае ні ў якім выпадку нельга забываць.

Даслоўна

«Калі будзе сябраваць моладзь усяго свету, мы будзем разумець, што захаваем мір для ўсёй планеты»

Старшыня Савета Рэспублікі Нацыянальнага сходу Рэспублікі Беларусь Наталля Качанава ў размове з журналістамі адзначыла сімвалічнасць старту праекта менавіта ў Брэсце.

— Тут у першыя дні Вялікай Айчыннай вайны на нашу зямлю ўступілі нямецкія захопнікі. Менавіта тут яны атрымалі першы сур’ёзны адпор. І гэтым мы ганарымся. Гэта наша гісторыя. І таму намі было прынята рашэнне — Саветам Рэспублікі Нацыянальнага сходу Рэспублікі Беларусь і Саветам Федэрацыі Федэральнага Сходу Расійскай Федэрацыі — заўсёды «Цягнік Памяці» мы будзем пачынаць тут. 

Вы ведаеце, што 22 чэрвеня ў нашай краіне — гэта дзень смутку і памяці, народнай памяці. Вядома, школьнікі будуць удзельнічаюць у мерапрыемствах. Тут яны адразу змогуць паглыбіцца ў атмасферу тых падзей, якія адбываліся на нашай зямлі.

На пытанне аб тым, ці будзе геаграфія ўдзельнікаў пашырацца, Наталля Качанава нагадала, што ўдзельнікамі першага «Цягніка Памяці» былі прадстаўнікі дзвюх краін: Беларусі і Расіі. 

— Цяпер гэта ўжо значна больш краін. Вядома, вельмі б хацелася, каб гэта былі ўсе краіны свету. Але мы выдатна разумеем рэальнасць. На самай справе, гэты праект дазваляе не проста паглыбіцца ў гісторыю і яшчэ раз успомніць усё, што было тады, калі нашы народы ўсе разам, плячо ў плячо, абаранялі свабоду і незалежнасць свайго агульнага дома, сваёй Айчыны. А яшчэ магчымасць пасябраваць, даведацца пра гісторыю нашых краін. Гэта вельмі важна. Мы бачым, што хлопцы і дзяўчаты сябруюць, яны камунікуюць. Усё роўна з якой яны краіны — яны сёння разам, яны шчаслівыя. Мы робім вялікую справу. Калі будзе сябраваць моладзь усяго свету, мы будзем разумець, што захаваем мір для ўсёй планеты, — рэзюмавала Старшыня Савета Рэспублікі.

Яна ВАЛАСАЧ

Фота БелТА

г. Брэст