Сяргей Набешка згадаў візіт беларускай дэлегацыі ў Мардовію ў 2023 годзе і адзначыў праяўленую ўвагу і зацікаўленасць расійскага рэгіёна ў развіцці супрацоўніцтва з нашай краінай. «Сістэмная і мэтанакіраваная работа дазваляе выбудоўваць новыя напрамкі, падымаць на новы ўзровень узаемадзеянне і ўмацоўваць дзелавыя адносіны», — падкрэсліў ён.

У склад бізнес-дэлегацыі ўвайшлі кіраўнікі вядучых прадпрыемстваў Мардовіі, якія прадстаўляюць шырокі спектр галін. Дзелавыя колы расійскага рэгіёна выказваюць зацікаўленасць у наладжванні і актыўным развіцці плённага супрацоўніцтва з беларускімі вытворцамі, пастаўшчыкамі і кампаніямі ў ключавых сферах, такіх як электроніка, машынабудаванне, фармацэўтыка, а таксама інавацыйныя навукова-тэхнічныя і IT-рашэнні.

Па словах Сяргея Набешкі, заўтра дэлегацыя Рэспублікі Мардовія таксама наведае шэраг беларускіх прадпрыемстваў. «Упэўнены, уся гэта работа прывядзе да неабходных вынікаў. Ужо цяпер магу сказаць, што падрыхтоўка толькі да гэтага мерапрыемства дазволіла выйсці на падпісанне буйных кантрактаў на агульную суму больш за 300 млн расійскіх рублёў», — падкрэсліў ён.

Акрамя таго, адбылося пасяджэнне Рабочай групы па супрацоўніцтве Рэспублікі Беларусь і Рэспублікі Мардовія Расійскай Федэрацыі, на якой былі разгледжаны пытанні супрацоўніцтва. Асноўнымі тэмамі абмеркавання сталі развіццё прамысловага сектара і сельскагаспадарчых карпарацый, сфера аховы здароўя, асаблівая ўвага ўдзелена абмеркаванню правядзення сумесных мерапрыемстваў па развіцці маладзёжнага і патрыятычнага руху паміж Беларуссю і Мардовіяй.