За месца ў чвэрцьфінале Кубка Колдэра каманда Протаса спрачаецца з «Уілкс-Барэ», два стартавыя матчы серыі да трох перамог прайшлі на пляцоўцы саперніка. Першая гульня 1 мая закончылася паражэннем «Хершы» (2:4), Ілья закінуў адну з шайбаў. У другім паядынку 3 мая госці ўзялі рэванш з лікам 2:1, беларускі нападаючы аддаў дзве галявыя перадачы і быў прызнаны другой зоркай.

Дзве наступныя сустрэчы адбудуцца ў Хершы 6 і 8 мая. У праведзеным рэгулярным чэмпіянаце Протас быў лепшым бамбардзірам сваёй каманды, набраўшы 66 (29+37) ачкоў у 69 матчах. У 2023 годзе «мядзведзі» сталі чэмпіёнамі АХЛ пры ўдзеле старэйшага брата Ільі Аляксея Протаса.