Рэстаўрацыя Ружанскага палаца пачалася ў 2008 годзе. За гэты час абноўлена цэнтральная ўязная брама і адноўлены бакавыя флігелі, дзе цяпер знаходзіцца музей. Праведзена рэстаўрацыя паўночна-ўсходняй аркады. Завершаны знешнія работы па рэстаўрацыі Усходняга корпуса. Там плануюць уладкаваць музейнае памяшканне, фондасховішча, шматфункцыянальную залу для правядзення культурных мерапрыемстваў, гасцініцу з невялікай колькасцю нумароў і кафэ. Далейшыя работы праводзяцца па праграме «Культурная прастора» ў 2026-2030 гадах. Спецыялісты выканаюць кансервацыю з элементамі рэстаўрацыі фрагментаў галоўнага корпуса і аркад, рэстаўрацыю ўнутры Усходняга корпуса.

Рэстаўрацыйныя работы праходзяць пад наглядам археолагаў. Цяпер вядуцца раскопкі на тэрыторыі галоўнага корпуса. Дзякуючы карпатлівай працы спецыялістаў свет убачылі аўтэнтычныя фундаменты дзвюх веж першапачатковага замка Сапегаў XVII стагоддзя. Паралельна ідзе абследаванне іх планіроўкі, канструктыўных асаблівасцей і навакольнага культурнага слоя.

Археолагі раскапалі вуглавую (паўночна-ўсходнюю) і паўднёвую (цэнтральную) вежы. «Вуглавая вежа была раскапана раней. Археалагічныя работы там вяліся, не памыліцца б, у 1990-х гадах. У гэтым годзе было прынята рашэнне вежу раскапаць для дэталёвага вывучэння яе канструкцыі, — расказалі ў аддзеле культуры. — Паўднёвую вежу знайшлі выпадкова. Па чарцяжах мы ведалі пра яе. А мінулым летам рэстаўратары расчышчалі фундамент і наткнуліся на кладку. Па чарцяжах Бекера (нямецкі архітэктар Ян Самуэль Бекер у сярэдзіне XVIII стагоддзя перабудоўваў замак Сапегаў у палацавы комплекс. — Заўвага БЕЛТА) мы сталі шукаць абрысы, каб знайсці доказы, што гэта вежа. Знайшлі вуглы, інфармацыю перадалі археолагам».

Гэтым летам археолагі прыняліся за работу і адкапалі фундамент паўднёвай вежы. Дзякуючы гэтаму пацвердзіліся звесткі, што ў замка Льва Сапегі было тры вежы. «Трэцяя — заходняя. Яе Бекер не разбураў. А дзве былі разбураны пры перабудове замка ў палацавы комплекс. Заходняя вежа ўвайшла ў агульны ансамбль галоўнага корпуса. Яе рэстаўратары таксама расчысцілі, знайшлі ўваход у падвалы і вінтавую лесвіцу. Мы знайшлі шмат адказаў на загадкі, якія пакінуў замак. Перакананы, што і наперадзе нас чакае яшчэ вельмі шмат адкрыццяў», — лічаць у аддзеле культуры.

Прызначэнне веж прыкладна зразумела па інвентарных вопісах. Напрыклад, у вуглавой вежы знаходзіўся кабінет Льва Сапегі, у паўднёвай — капліца. Вежы мелі абарончы характар, як і ўвесь замак.

Верагодна, галоўны корпус будзе музеефікаваны. Для гэтага спецыялістам трэба разумець, як яго прыстасаваць пад турыстычныя патрэбы, праводзіць там паўнацэнныя экскурсіі. «Рашэнне плануецца прыняць да канца года, пасля заканчэння раскопак і правядзення абследаванняў. Будзем бачыць, з чым давядзецца працаваць, што можам з гэтага зрабіць, і тады ўжо распрацоўваць канцэпцыю. Адкрыецца магчымасць прагуляцца па тэрыторыі галоўнага корпуса і ўявіць, як тут усё было на самай справе», — рэзюмавалі ў аддзеле культуры Пружанскага райвыканкама.