Выступленне Прэзідэнта Беларусі Аляксандра Лукашэнкі на міжнародным патрыятычным форуме Саюзнай дзяржавы «Вялікая спадчына — агульная будучыня» напярэдадні святкавання 80-годдзя Перамогі савецкага народа над фашысцкай Германіяй і яе сатэлітамі нікога не пакінула абыякавым, падкрэслівае парламентарый:

— Для нас, беларусаў, якія страцілі кожнага трэцяга ў гады ваеннага ліхалецця, словы Кіраўніка нашай дзяржавы аб захаванні гістарычнай памяці і абароне гістарычнай праўды аб Вялікай Айчыннай вайне асабліва важныя. 

Ён нагадаў, што кожная сям’я страціла родных і блізкіх у барацьбе з нямецка-фашысцкімі захопнікамі і боль ад страты да гэтага часу перадаецца з пакалення ў пакаленне: 

— Сёння мы ўсё робім для ўвекавечання памяці аб загінуўшых на палях бітваў франтавіках і партызанах, аб ахвярах фашысцкіх канцлагераў і шталагаў, аб закатаваных у гестапаўскіх засценках падпольшчыках, расстраляных і спаленых мірных грамадзян, аб тысячах нашых суайчыннікаў, памерлых ад ран, ад сыпнога тыфу і іншых хвароб ваеннага часу. 

Парламентарый канстатуе: беларусы свята ўшаноўваюць памяць аб усіх, хто аб’яднаўся дзеля выратавання свету ад «карычневай чумы» і стаў у шэрагі непрымірымых змагароў з чалавеканенавісніцкай нацысцкай ідэалогіяй, хто смела кінуў выклік ваеннай машыне аб’яднанай Еўропы. 

— Наш Прэзідэнт магістральна пазначыў дзяржаўную лінію на прымнажэнне гістарычнай памяці, сказаўшы літаральна наступнае: «У Беларусі мы актыўна прасоўваем у грамадстве разуменне таго, што памяць аб Вялікай Перамозе — гэта частка нацыянальнай ідэі. Мы стараемся рабіць усё, каб нашы дзеці памяталі, што гэтай перамогай мы моцна звязаны са сваімі ўсімі народамі, рускім народам, усімі народамі былога Савецкага Саюза», — акцэнтуе ўвагу Алег Дзячэнка.

Разам з тым, сёння на Захадзе можна назіраць абсалютна іншыя тэндэнцыі:

— Нашчадкі фашысцкага адкіды пры адкрытым папушчальніцтве палітычнага кіраўніцтва шэрагу еўрапейскіх краін руйнуюць манументы, абеліскі і мемарыялы, устаноўленыя савецкім воінам-вызваліцелям, апаганьваюць месцы пахаванняў, вядуць прапаганду неанацызму і рэваншызму, займаюцца перапісваннем гісторыі. Прычым гэта не проста нейкія асобныя эксцэсы з боку маргіналаў з праварадыкальных колаў, а арганізаваная палітыка тых кіруючых сіл, якія люта ненавідзяць славянскі свет і па-ранейшаму імкнуцца «Дранг нах Остэн». Па-іншаму і не назавеш гэтае агрэсіўнае пашырэнне Паўночнаатлантычнага ваенна-палітычнага альянсу, якое адбываецца ў парушэнне ўсіх дамоўленасцяў і нормаў міжнароднага права. 

Парламентарый робіць выснову: 

— У гэтым заключаецца ўся сутнасць няўдзячнага Захаду, які свядома запаў у стан гістарычнай дэменцыі і аддаўшы забыццю жахі мінулай вайны, стаў на слізкі шлях развязвання новых «халодных» і «гарачых» кровапралітных войнаў на еўрапейскім кантыненце.