За прызы ў вагавой катэгорыі да 63 кг Макрэцкая змагалася разам з суайчынніцай Палінай Слесарэнка. Яна пацярпела няўдачу на стадыі чвэрцьфіналу, пасля чаго прайшла двух саперніц у суцяшальнай сетцы. Слесарэнка стартавала на турніры з дзвюх перамог, але ў паўфінале саступіла шматразовай чэмпіёнцы Расіі Каміле Бадуравай. У выніку беларускі сышліся ў паядынку за бронзавы медаль, мацней у якім апынулася Макрэцкая.

Блізкі да медаля спаборніцтваў быў Арцём Коласаў, які выступае ў вазе да 60 кг. Па ходзе турніру наш дзюдаіст атрымаў чатыры перамогі, але ў сутычцы за трэцяе месца прайграў Камалідзіну Бахціераву з Узбекістана. Яшчэ адзін беларус Конрад Шоку (да 66 кг) завяршыў выступленні ў першым раўндзе. 

10 жніўня на татамі выйдуць нашы Захар Козел (да 81 кг), Панкрат Сурба, Ягор Варапаеў (абодва — да 100 кг), Ягор Кухарэнка (звыш 100 кг), Ганна Буракова (да 52 кг) і Ксенія Даніловіч (да 57 кг). Усяго Краснадарскі этап серыі Russian Judo Tour сабраў каля 250 дзюдаістаў з 18 краін Еўропы, Азіі і Афрыкі.