Спецыялісты ЕАБР зазначаюць, што эканоміка Беларусі захавала высокія тэмпы росту ў першым квартале 2025 года. Драйверам для росту стала павелічэнне ўнутранага попыту: вырасла спажывецкая актыўнасць, рост паказваюць таксама інвестыцыі як у прыватны бізнес, так і ў дзяржпрадпрыемствы.

Згодна з прагнозам ЕАБР, у базавым сцэнарыі рост ВУП у Беларусі ў бягучым годзе прагназуецца ў памеры 3%, гэты паказчык быў павышаны на 0,4 працэнтнага пункта з-за высокіх паказчыкаў першага квартала 2025 года.

«У 2026-2027 гадах эканоміка будзе вяртацца да траекторыі збалансаванага росту», — гаворыцца ў прагнозе.

Аналітыкі банка адзначаюць, што ВУП, паводле прагнозу, павялічыцца на 1,9% у 2026 годзе і на 1,5% — у 2027-м.

Спецыялісты ЕАБР назвалі і фактар рызыкі для беларускай эканомікі — яе запаволенне можа адбыцца з-за рэзкага аслаблення глабальнага эканамічнага росту. Уплыў на эканоміку ў рэспубліцы ў гэтым выпадку можа аказаць пагаршэнне эканамічнай сітуацыі ў Расіі, што, на думку аналітыкаў, прывядзе да зніжэння попыту на беларускія тавары ў РФ.

«Захаванне высокіх тэмпаў росту эканомікі Расіі — пазітыўны фактар рызыкі для беларускай эканомікі. Калі ВУП Расіі будзе расці на 2,5% у год або вышэй у сярэднетэрміновай перспектыве, то беларускі экспарт атрымае новы імпульс да росту», — падкрэслілі ў ЕАБР.