Прадпрыемства знаходзіцца ў Фаніпалі за 20 км ад Мінска, прадукцыя пастаўляецца не толькі на беларускі рынак, але і на экспарт — у Еўропу, ЗША і Расію. Наведвальнікам пакажуць поўны цыкл вырошчвання асятровых рыб, пазнаёмяць з тонкасцямі сучаснай аквакультуры і прапануюць паспрабаваць свежую чорную ікру непасрэдна на вытворчасці.

Экскурсанты змогуць таксама паназіраць за працэсам кармлення асятроў, убачыць УГД самкі асятра і разгледзець ікрынку пад мікраскопам. З часам, як кажуць арганізатары, дэлікатэс можна будзе і набыць. 

Экскурсіі будуць праводзіцца для арганізаваных груп. Іх падрыхтоўкай ужо заняліся турыстычныя агенцтвы.

Традыцыйную чорную ікру даюць асетр, бялуга, сеўруга, шып. Легальна яе сёння можна атрымліваць толькі ў штучных умовах. Асятровыя ў натуральным асяроддзі знаходзяцца на мяжы знікнення. Найбуйнейшымі сусветнымі гульцамі на гэтым рынку з’яўляюцца Расія, Кітай, Францыя, ЗША, Італія і Іран. Вада для асятровых рыб павінна быць крышталёва чыстай. На заводзе ў Фаніпалі працуе складаная сістэма басейнаў з пастаянным фільтраваннем, азанаваннем і кантролем якасці. 

У РСТО нагадалі, што з Беларусі дазволена вывозіць да 250 грамаў чорнай асятровай ікры, усё, што перавышае гэты ліміт, лічыцца камерцыйнай партыяй.