«Сёння такая прыемная падзея — чарговы этап развіцця вашай кампаніі ў Беларусі, — адзначыў Аляксандр Турчын. — Тыя дамоўленасці, якія ў нас ёсць, выконваюцца. Прыемна канстатаваць».

Да сустрэчы ва ўрадзе Таццяна Кім наведала новы складскі комплекс, размешчаны на тэрыторыі індустрыяльнага парка «Вялікі камень». Яна звярнула ўвагу, што пры рэалізацыі праекта былі некаторыя цяжкасці, што звязана ў тым ліку з тым, што ў Беларусі да такіх аб’ектаў прад’яўляюцца павышаныя патрабаванні.

«Гэта вельмі добра і правільна, — адзначыла Таццяна Кім. — Гэта першы склад, які запусцілі за межамі Расійскай Федэрацыі. Паглядзелі, якія могуць памылкі ўзнікаць. Калі наступны склад будзем будаваць, ужо, вядома, пайдзе значна хутчэй».

Заснавальніца і гендырэктар Wildberries паінфармавала, што абмяркоўваліся дадатковыя меры падтрымкі. Запушчана платформа росту для беларускіх вытворцаў. «У цэлым разлічваем, што вельмі добрыя вынікі будуць, таму што ў нас праграма ўжо абкатана, больш за год працуе ў Расіі. Бачым, якія вынікі і для вялікіх, і маленькіх кампаній. І, у прынцыпе, у Беларусі вялікі патэнцыял», — дадала Таццяна Кім.

У цэнтры ўвагі на сустрэчы было стратэгічнае партнёрства і новыя гарызонты для лакальнага бізнэсу. На парадку дня — ход работ і мерапрыемствы па завяршэнні будаўніцтва лагістычнага хаба. Новы цэнтр паскорыць дастаўку і пашырыць прысутнасць беларускіх тавараў.

Агульны аб’ём продажаў беларускіх селераў за 2025 год наблізіўся да 3,9 млрд рублёў. Амаль палова — тавары беларускай вытворчасці. Іх экспарт праз пляцоўку вырас амаль у 5 разоў за год.

Усяго ў краіне адкрыта больш за 3 тыс. пунктаў выдачы заказаў, на Wildberries зарэгістравана 22 тыс. беларускіх прадаўцоў. З 2024 года на маркетплэйсе дзейнічае пастаянны раздзел «Зроблена ў Беларусі». Там прадстаўлена ўжо каля 11,5 тыс. тавараў.

Новы складскі комплекс кампаніі стане найбуйнейшым лагістычным аб’ектам у краіне. Праект рэалізуецца для развіцця лагістычнай інфраструктуры Wildberries у Беларусі. На складзе ў тым ліку могуць знаходзіцца буйнагабарытныя тавары, прадукты харчавання, якія не патрабуюць асаблівага тэмпературнага рэжыму.