Сератанін, які таксама называюць «гармонам шчасця», уплывае не толькі на настрой, але і на стрававальныя працэсы. Пра гэта расказала эндакрынолаг і майер-тэрапеўт цэнтра здароўя Verba Mayr Наталля Кірдзянкіна.

«Сератанін — адзін з асноўных нейрамедыятараў, гэта значыць рэчываў, якія ўплываюць на наш настрой, — тлумачыць Кірдзянкіна. — Менавіта гэты гармон адказвае за адчуванне шчасця, рэгулюе эмоцыі, а таксама кантралюе апетыт і пачуццё насычэння».

Ад 90 да 95% сератаніну выпрацоўваецца ў кішэчніку. Апроч зніжэння апетыту пры насычэнні, у сератаніна ёсць яшчэ адна важная функцыя — абарона кішэчніка. Калі чалавек з’еў нешта таксічнае ці пераеў, арганізм выпрацоўвае больш сератаніну. Гэта альбо выклікае пачуццё млоснасці, альбо паскарае страваванне, каб хутчэй ачысціць кішэчнік.