У пацярпелых ад аварыі на Чарнобыльскай АЭС раёнах ужо вырасла новае пакаленне, якое хоча жыць на сваёй зямлі, развівацца, займацца навукай, медыцынай і гэтак далей. Гэта падкрэсліў начальнік галоўнага ўпраўлення па праблемах ліквідацыі наступстваў катастрофы на Чарнобыльскай АЭС Гомельскага аблвыканкама Дзмітрый Руткоўскі на палях навукова-практычнай канферэнцыі «Сучасныя праблемы радыяцыйнай медыцыны: ад навукі да практыкі», якая праходзіць у Гомелі на базе Рэспубліканскага навукова-практычнага цэнтра радыяцыйнай медыцыны і экалогіі чалавека, паведамляе БелТА.
Дзмітрый Руткоўскі выдзеліў тры этапы ў жыцці нашай краіны пасля аварыі на ЧАЭС. «Першы этап — гэта, безумоўна, ліквідацыя наступстваў аварыі. Нам неабходна было тэрмінова прымаць меры, адсяляць населеныя пункты. Мы (у Гомельскай вобласці. — Заўв. БелТА) пабудавалі больш за 30 тыс. кватэр, дамоў для таго, каб людзі маглі перасяліцца, пераехаць з гэтых тэрыторый. Мы прайшлі сур’ёзны этап, калі наладжвалі жыццё, будавалі інфраструктуру, адраджалі тэрыторыі, займаліся дэзактывацыяй. Паступова перайшлі ад адраджэння да паэтапнага сацыяльна-эканамічнага развіцця (пацярпелых ад аварыі на ЧАЭС. — Заўв. БелТА) раёнаў», — адзначыў ён.
«Мы бачым, што практычна радыефобіі ў раёнах ужо не існуе. Вырасла новае пакаленне, якое хоча жыць на сваёй зямлі, развівацца, займацца навукай, медыцынай, спортам і гэтак далей», — звярнуў увагу начальнік галоўнага ўпраўлення.
«І мы (Гомельская вобласць. — Заўв. БелТА) дзякуючы ўраду, Прэзідэнту, які падтрымлівае чарнобыльскую праграму, атрымліваем сур’ёзную фінансавую крыніцу, падтрымку, каб мы маглі займацца сацыяльнай работай, ахоўнымі мерамі ў аграпрамысловым комплексе, каб атрымліваць чыстую прадукцыю», — сказаў ён.
Лакаматывам усёй праграмы ён назваў развіццё тэрыторый. «Гэта жыллё, вытворчасць, новыя працоўныя месцы, эканоміка. Мы бачым, як памяняліся нашы тэрыторыі, як яны развіваюцца. Мы будуем спартыўныя аб’екты, развіваем медыцынскую базу», — падкрэсліў Дзмітрый Руткоўскі.
Навукова-практычная канферэнцыя «Сучасныя праблемы радыяцыйнай медыцыны: ад навукі да практыкі» аб’яднала ў Гомелі больш за 200 удзельнікаў на базе Рэспубліканскага навукова-практычнага цэнтра радыяцыйнай медыцыны і экалогіі чалавека. Напярэдадні 40-й гадавіны аварыі на Чарнобыльскай АЭС у абмеркаванне актуальных пытанняў у вочным і анлайн-фарматах уключыліся ўрачы, вучоныя, эксперты з Беларусі, Расіі, Кітая. Галоўная мэта сустрэчы — абмен назапашаным вопытам на стыку радыяцыйнай і клінічнай медыцыны, радыяцыйнай экалогіі, эпідэміялогіі і радыебіялогіі.
Арганізатарамі канферэнцыі выступілі Міністэрства аховы здароўя і Рэспубліканскі навукова-практычны цэнтр радыяцыйнай медыцыны і экалогіі чалавека, суарганізатарамі — Інстытут радыебіялогіі НАН Беларусі і Гомельскі дзяржаўны медыцынскі ўніверсітэт.
