Працоўны графік кіраўніка дзяржавы традыцыйна багаты на падзеі. У полі зроку беларускага лідара — абсалютна розныя па тэматыцы пытанні, якія датычацца як унутранага парадку дня, так і міжнароднага трэка. Толькі на мінулым тыдні ў Палацы Незалежнасці абмяркоўвалася ўзмацненне пазіцый Беларусі ў Паўднёвай Азіі і Паўднёвай Афрыцы, у чарговы раз гучала тэматыка беларуска-амерыканскага ўзаемадзеяння. А ўжо на пачатку гэтага тыдня намечаны канкрэтныя планы, звязаныя з пашырэннем супрацоўніцтва нашай краіны з расійскімі рэгіёнамі. Акрамя таго, днямі ў цэнтры ўвагі Аляксандра Лукашэнкі знаходзіліся абаронная сфера, кадравыя пытанні і міжканфесійныя стасункі.
Сабралі найбольш яркія цытаты беларускага лідара, агучаныя ім на мінулым тыдні, а таксама ў пачатку гэтага ў Палацы Незалежнасці. Асноўныя акцэнты абмеркавалі разам з экспертамі.
«Мы будзем выходзіць на іншыя рэгіёны, асвойваць новыя рынкі, адкрываць для сябе новыя краіны»
«Эканоміка — гэта база любых адносін. Таму мы б хацелі выбудаваць з вамі цвёрдыя, добрыя адносіны».
(Падчас сустрэчы з міністрам замежных спраў, працаўладкавання за мяжой і турызму Шры-Ланкі Віджытам Хератам, 14 мая 2026 г.).
Як звярнуў увагу ў эфіры ток-шоу «Будні» на «Альфа Радыё» член Пастаяннай камісіі па правах чалавека, нацыянальных адносінах і сродках масавай інфармацыі Палаты прадстаўнікоў Вадзім ГІГІН, Беларусь стала больш актыўна паводзіць сябе ў Паўднёвай Азіі.
«Прэзідэнт ставіў задачу сур’ёзна нарошчваць тавараабарот з Індыяй, цяпер — Шры-Ланка, — заўважыў парламентарый. — Гэта краіна нядаўна перажыла вельмі складаную палітычную трансфармацыю, былі ўзрушэнні, але цяпер яна ўстае на шлях устойлівага развіцця і шукае партнёраў, у тым ліку за межамі рэгіёна. І для нас важна знаходзіць пункты ўваходу. Мы таксама працуем і ў Афрыцы, і ў Лацінскай Амерыцы»
У якасці прыкладу Вадзім Гігін прывёў М’янму, супрацоўніцтва з якой прыносіць адчувальныя вынікі — літаральна некалькі гадоў таму гэта краіна была для Беларусі фактычна закрыта, а цяпер сяброўства і супрацоўніцтва развіваюцца. «Гэта сведчыць аб новых поспехах беларускай дыпламатыі, — падкрэсліў дэпутат. — Еўропа закрылася ад Беларусі, а мы будзем выходзіць на іншыя рэгіёны, асвойваць новыя рынкі, адкрываць для сябе новыя краіны. Мы не можам залежаць толькі ад аднаго рэгіянальнага рынку. Калі жадаем быць незалежнымі і суверэннымі, то павінны заяўляць аб сабе ў розных кутках планеты. Мы не навязваем гегемонію, не ствараем сфер уплыву — на гэта няправільна было б разлічваць. Але мы жадаем пашыраць геаграфію супрацоўніцтва і сяброўства з Беларуссю».
Парламентарый растлумачыў, чым Беларусь і Шры-Ланка цікавыя адна адной. «Прэзідэнт абазначыў дакладныя пазіцыі: трактары, прыборы, каштоўныя камяні і не толькі, — звярнуў увагу Вадзім Гігін. — Беларусь гатова аказаць дапамогу любой краіне ў арганізацыі сельскай гаспадаркі. Зімбабвэ — канкрэтны прыклад: краіна выйшла на высокую ўраджайнасць, вырашыла праблему пагрозы голаду, набыла тэмпы развіцця, пачала экспарт харчавання. Таксама Беларусь можа дапамагчы і Шры-Ланцы. Прапанаваць не толькі трактары, але і нашы ўгнаенні, перадавую агракультуру».
Вадзім Гігін закрануў і тэму адукацыйных паслуг. Паводле яго слоў, у Паўднёвай Азіі беларуская адукацыя карыстаецца вялікай папулярнасцю, асабліва медыцынскія і інжынерныя спецыяльнасці. Спектр можа быць самым шырокім: лёгкая прамысловасць, прыборабудаванне, ІT.
«Прэзідэнт падкрэслівае, што Беларусь гатова ісці настолькі далёка, наколькі да гэтага гатовы іншыя краіны, — канстатаваў член Пастаяннай камісіі па правах чалавека, нацыянальных адносінах і сродках масавай інфармацыі Палаты прадстаўнікоў. — Фактычна няма закрытых тэм. Што ім трэба — па абаронцы ўзмацніцца? Дапаможам. Кадры навучыць? Навучым. Ураджайнасць падняць? Зробім! Рэалізаваць сумесныя праекты ў лёгкай прамысловасці? І гэта ў рамках нашай кампетэнцыі. Усё гэта мы гатовы ажыццяўляць».
«Без новага, сучаснага ўзбраення дастаткова складана гарантаваць абарону народа і дзяржавы»
«Без аснашчэння войск сучасным узбраеннем вырашаць задачы абароны немагчыма».
(Падчас нарады па пытаннях дзяржаўных праграм узбраення і дзяржаўнага абароннага заказу, 11 мая 2026 г.)
Член Пастаяннай камісіі Савета Рэспублікі па міжнародных справах і нацыянальнай бяспецы, ваенны камісар Гомельскай вобласці Андрэй КРЫВАНОСАЎ звярнуў увагу на напружаную геапалітычную абстаноўку ў Еўропе.
«На захадзе ад Беларусі, нашымі суседзямі, ажыццяўляецца інтэнсіўнае нарошчванне наступальнага ўзбраення, — канкрэтызаваў ён. — А на поўдні ўвогуле пяты год адбываюцца баявыя дзеянні. Таму ў Беларусі Узброеныя Сілы, вывучаючы вопыт узброеных канфліктаў, пастаянна ўдасканальваюць баявую падрыхтоўку і метады вядзення баявых дзеянняў».
Як падкрэсліў парламентарый, без новага, сучаснага ўзбраення дастаткова складана сёння супрацьстаяць пагрозам і выклікам, гарантаваць абарону народа і дзяржавы.
«Наша дзяржава не шкадуе сродкаў на закупку і вытворчасць сучаснага ўзбраення, прытрымліваючыся прынцыпу неабходнай дастатковасці», — канстатаваў Андрэй Крываносаў.
— І ў дзяржаўнай праграме ўзбраення ўсё гэта ўлічана і пераўтвараецца ў жыццё. Мы не ўцягваемся ў «гонку ўзбраенняў», а з улікам эканамічнай мэтазгоднасці аснашчаем Узброеныя Сілы неабходным сучасным узбраеннем“.
Пры гэтым, як удакладніў сенатар, ваеннаслужачыя вельмі беражліва адносяцца да новых відаў узбраення. «Як да ўзбраення, якое даўно знаходзіцца ў эксплуатацыі (прытрымліваючыся прынцыпу — няма старога ўзбраення, а ёсць спраўнае ў працоўным стане і няспраўнае), так і да новага, — удакладніў ён. — Пры гэтым вельмі важная роля прафесіяналаў, якія эксплуатуюць узоры ўзбраення. Беларуская адукацыя эфектыўна рыхтуе такія кадры».
Сумяшчэнне навуковага і вытворчага кластараў мае асаблівае значэнне ў плане абароны свайго тэхналагічнага суверэнітэту»
«Прамысловая кааперацыя — гэта аснова будучага нашага развіцця, узаемаадносін паміж Беларуссю і Расіяй».
(Падчас перагавораў з губернатарам Свярдлоўскай вобласці Дзянісам Паслерам, 18 мая 2026 г.)
Як адзначыў палітолаг, кандыдат гістарычных навук Аляксей БЯЛЯЕЎ, сустрэчы Прэзідэнта Беларусі і губернатараў расійскіх рэгіёнаў, якія ўжо сталі традыцыйнымі, падкрэсліваюць блізкае палітычнае і сацыяльна-эканамічнае супрацоўніцтва дзвюх краін. «Тое, што беларускі лідар заўсёды паглыблены ў парадак дня, у тым ліку суседняй вялікай краіны, паказвае яго рэальную зацікаўленасць у рэалізацыі нашых агульных задач, — растлумачыў эксперт. — Пры гэтым беларусы разглядаюць Расію як краіну вялікую, дзе кожны рэгіён своеасаблівы. Нам вельмі важна выкарыстаць гэтыя адрозненні для прасоўвання ўласнай прадукцыі, магчымасці рэалізацыі кропкавых, канкрэтных праектаў».
Па словах Аляксея Бяляева, Свярдлоўская вобласць па сутнасці складае палову Беларусі: у рэгіёне пражывае 4,2 — 4,3 млн насельніцтва. «Там дастаткова магутная горназдабыўная галіна, — канкрэтызаваў ён. — Гэта магчымасць для Беларусі завязаць важныя кантакты па пастаўцы металаў, руд, металапракату, у чым, безумоўна, мае патрэбу наша цяжкая прамысловасць, паколькі сваіх сыравінных крыніц практычна няма. Мы можам прапанаваць гэтаму рэгіёну і аўтамабілі, і абсталяванне для здабычы сыравінных рэсурсаў. Наша аўтамабільная прамысловасць акурат спецыялізуецца на вытворчасці вялікіх горных самазвалаў, што вельмі запатрабавана ў Расіі. Акрамя таго (аб чым гаварыў наш Прэзідэнт), у Беларусі захаваны навыкі і сур’ёзная матэрыяльная база па станкабудаванні, і тут мы можам падставіць плячо Расіі».
Знаходзячыся пад заходнімі санкцыямі, Беларусь і Расія, па словах палітолага, вымушаны займацца імпартазамяшчэннем, абараняць сваю тэхналагічную бяспеку і тэхналагічны суверэнітэт. «Сутыкаючыся з новымі выклікамі, атрымліваючы новыя тэхналогіі, беларуская навукова-даследчая сфера адчувае новы штуршок, — лічыць Аляксей Бяляеў. — Мы можам распрацаваць новыя ўнікальныя дэталі і вузлы, якія раней не вырабляліся, што ў выніку стане сумесным беларуска-расійскім прадуктам. Сумяшчэнне навуковага і вытворчага кластараў для нас мае асаблівае значэнне ў плане абароны свайго тэхналагічнага суверэнітэту».
Асобным кірункам прамысловай кааперацыі, па словах эксперта, з’яўляецца нафтаперапрацоўка. «Мы бачым, што інфраструктура па нафтаперапрацоўцы, па дастаўцы нафты ў Расіі падвяргаецца пагрозе з боку тых жа ўкраінскіх БПЛА, дыверсантаў, — канстатаваў ён. — Выхад са строю такой важнай галіны, як нафтаперапрацоўка, якая вырабляе паліва, мазут, шматлікія маслы, прыводзіць да вельмі сур’ёзных праблем у расійскім прамысловым сектары. Своеасаблівым „ратавальным колам“ з’яўляюцца два нашы найбуйнейшыя нафтаперапрацоўчыя прадпрыемствы ў Мазыры і Наваполацку. Прэзідэнт гаварыў губернатару Свярдлоўскай вобласці аб тым, што мы можам прадаставіць рэгіёну свае прадукты нафтаперапрацоўкі. Для нас гэта будзе азначаць і больш высокую загружанасць нашых заводаў, і занятасць насельніцтва. Для Расіі — гэта бесперабойнае паступленне паліва, гаруча-змазачных і іншых прадуктаў нафтаперапрацоўкі. Гэта ўзаемная сінергія».
У цэлым, як акцэнтаваў увагу Аляксей Бяляеў, гаворачы аб Свярдлоўскай вобласці, Прэзідэнт адзначаў, што патэнцыял нашага ўзаемадзеяння вельмі вялікі, і той тавараабарот, які ёсць, магчыма падвоіць у найбліжэйшы час. «Гэта па сілах абедзвюм краінам», — лічыць палітолаг.
Вераніка КАНЮТА
