Прэзідэнт Беларусі Аляксандр Лукашэнка прыняў рашэнне аб пераносе тэрміну павышэння тарыфаў для насельніцтва ў сферы жыллёва-камунальнай гаспадаркі з 1 студзеня на 1 сакавіка гэтага года. Як адзначылі ў прэс-службе Кіраўніка дзяржавы, гэта зроблена дзеля недапушчэння значнага павелічэння для грамадзян фінансавай нагрузкі па плаце за ЖКП. Эксперты — аб важным для людзей рашэнні. 

— Клопат пра чалавека — асноўны пастулат беларускай дзяржавы. А дабрабыт людзей — фундаментальная каштоўнасць, адлюстраваная ў тым ліку ў многіх праграмных дакументах, — падкрэсліла член Пастаяннай камісіі Савета Рэспублікі па міжнародных справах і нацыянальнай бяспецы, старшыня Гомельскай абласной арганізацыі рэспубліканскага грамадскага аб’яднання «Беларускі Чырвоны Крыж» Ала Смаляк. — Прыкладам высокай адказнасці і ўвагі да людзей з’яўляецца і рашэнне Прэзідэнта краіны Аляксандра Лукашэнкі аб пераносе павышэння тарыфаў на жыллёва-камунальныя паслугі з 1 студзеня на 1 сакавіка. Бо камунальныя плацяжы — гэта не проста лічбы ў жыроўках, а частка сямейнага бюджэту. І ў сітуацыі, калі зімовыя ўмовы надвор’я патрабуюць большага расходу энергіі на ацяпленне, кіраўніцтва краіны прымае рашэнне, накіраванае на стабілізацыю дабрабыту насельніцтва, на прадухіленне дадатковай нагрузкі для грамадзян пры аплаце за ЖКП. Гэта яскравае сведчанне таго, што чалавек у Беларусі — галоўны прыярытэт.

Паралельна парламентарый звяртае ўвагу на зусім іншае стаўленне да людзей у некаторых суседніх краінах:

— Напрыклад, жыхары Літвы атрымалі студзеньскія квітанцыі за ацяпленне з ростам 85-95 % да снежня мінулага года праз анамальныя халады і скасаванне падатковых паслабленняў. Гэта велізарная нагрузка на людзей. Але як яны будуць з ёй спраўляцца, застаецца выключна іх асабістым пытаннем. 

У той жа час сенатар звяртае ўвагу, што ў нашай краіне клопат пра чалавека — гэта заўсёды канкрэтныя справы, рашэнні, накіраваныя на падтрымку кожнага:

— І чалавек у любой сітуацыі адчувае сваю абароненасць з боку дзяржавы.

Член Пастаяннай камісіі Палаты прадстаўнікоў па міжнародных справах Аляксандр Шпакоўскі ў эфіры ток-шоу «Будні» на «Альфа-Радыё» так пракаменціраваў перанос тэрміну павышэння тарыфаў для насельніцтва:

— Прэзідэнт абсалютна дакладна паступіў, падтрымаўшы прапанову аб пераносе тэрмінаў павышэння платы за жыллёва-камунальныя паслугі са студзеня на сакавік па той простай прычыне, што на працягу бягучага месяца наша насельніцтва, мы ўсе з вамі, сутыкаемся з беспрэцэдэнтнымі ўмовамі надвор’я. Гэта значыць, ужо даволі даўно не было такой зімы. Слупок тэрмометра перыядычна апускаецца ніжэй за 20 °C, даходзіць да -30 °C. Нават цяпер: сёння нязначнае, скажам так, паніжэнне тэмпературы — -11-12 °C, а кажуць, што ўжо заўтра-паслязаўтра яна зноў апусціцца да -18 °C і ніжэй.

Натуральна, падкрэслівае парламентарый, гэта стварае павышаную нагрузку на цепласеткі:

— Спажываецца значна больш ацяплення, газу, чым у звычайны перыяд часу. І ў гэтай сувязі, натуральна, кошт жыллёва-камунальных паслуг будзе вышэйшы для людзей у студзені, чым у снежні. Калі да гэтага дадаць яшчэ і планавае павышэнне расцэнак, то, мабыць, для асобных катэгорый грамадзян гэтыя разлікі могуць быць дастаткова балючымі, асабліва для людзей з невысокім узроўнем даходаў. У сувязі з гэтым Прэзідэнтам прынята, на мой погляд, сацыяльнае і гуманнае рашэнне — адкласці павышэнне тарыфаў па плацяжах за жыллёва-камунальныя паслугі на сакавік 2026 года. Гэта значыць, у студзені і лютым такім чынам палягчаецца нагрузка для нашых людзей.

— Перанос тэрмінаў павышэння тарыфаў на жыллёва-камунальныя паслугі — правільны крок, які не дазволіць стварыць дадатковай фінансавай нагрузкі для грамадзян ва ўмовах цяперашняй зімы, — салідарны з меркаваннем калегі-парламентарыя член Пастаяннай камісіі Савета Рэспублікі па рэгіянальнай палітыцы і мясцовым самакіраванні Аляксандр Максімчук. — Насельніцтву краіны не трэба будзе перажываць пра рост платы за жыллёва-камунальныя паслугі за кошт павелічэння аб’ёмаў спажывання паслуг у самы халодны перыяд года, што дазволіць знізіць нагрузку на сямейны бюджэт. Важна ўлічваць, што павышэнне тарыфаў на жыллёва-камунальныя паслугі павінна быць збалансаваным, а з улікам неспрыяльных умоў надвор’я, якія ўстанавіліся, меры не павінны прывесці да пагаршэння якасці паслуг, што аказваюцца. 

У сваю чаргу, член Пастаяннай камісіі Палаты прадстаўнікоў па правах чалавека, нацыянальных адносінах і сродках масавай інфармацыі Вадзім Гігін у сваім ТГ-канале адзначыў, што прынята сур’ёзнае рашэнне, якое мае не толькі эканамічнае, але і ідэалагічнае вымярэнне:

— Гэта сведчанне сацыяльнага характару нашай дзяржавы. Дзяржавы для народа. У няпростых умовах надвор’я ўлада імкнецца падтрымаць грамадзян. Мы ж разумеем, што пры вялікіх маразах і моцных снегападах нагрузка на ЖКГ узрастае, павялічваюцца і фінансавыя выдаткі. І дзяржава бярэ на сябе гэту нагрузку.

На яго думку, гэта і ёсць праява грамадскай салідарнасці, справядлівасці:

— Асабліва калі мы параўнаем з сітуацыяй у многіх іншых краінах. Наша беларуская мадэль народаўладдзя заключаецца не толькі ў інстытутах і працэдурах. Яна ў такіх адказных рашэннях і справах. Канкрэтных справах.