Упершыню ў вішнёвай сталіцы Беларусі ў рамках фестывалю 18 ліпеня адбудзецца міжнародны маладзёжны форум. Пляцоўкай для яго стане гарадскі дом культуры. У 14.00 у «Вішнёвым фармаце» прадстаўнікі сямі раёнаў Віцебшчыны паразмаўляюць з аднагодкамі з Расіі. Спецыяльна запрошаны госць мерапрыемства — тройчы ўладальнік прэзідэнцкага гранта Расіі, лаўрэат мноства конкурсаў, прэмій дырыжор хору Аляксей Пугачоў. Маладыя людзі таксама змогуць даведацца шмат цікавага ад экспертаў у галіне фестывальнага руху як Беларусі, так і Расіі. Магчыма, у актыўным асяроддзі народзяцца цікавыя ідэі і адносна ягаднага фэсту ў Глыбокім.

У райцэнтры ўпершыню будуць прадстаўлены традыцыі і культура Японіі. Выставу з Краіны ўзыходзячага сонца рыхтуе японскае пасольства. Убачыць вытанчаныя творы мастацтва (скульптуры, статуэткі, адзенне, у тым ліку вясельныя кімано, макеты архітэктурных аб’ектаў Японіі) можна будзе ў выставачнай зале ў 15.00. У 17.30 з Глыбоцкага гісторыка-этнаграфічнага музея стартуе інтэлектуальна-забаўляльны прыгодніцкі квэст «Вішнёвыя заданні». Таксама госці свята на працягу дня змогуць наведаць спаборніцтвы па валейболе, выставу-кірмаш работ народных майстроў, а дзеці — пацешыцца на атракцыёнах. У 18.00 на цэнтральнай плошчы горада адбудзецца этна-вечарынка, а пасля яе, а 9-й вечара, усіх запрашаюць на дыскатэку, якая завершыцца фаер-шоу.

У праграме другога дня фестывалю будзе нямала вішнёвых мерапрыемстваў. У 10.30 на цэнтральнай плошчы пасля ўрачыстага прывітання пройдзе гала-канцэрт «Вішнёвая кветка сяброўства». У 12.00 аматары актыўнага адпачынку змогуць паўдзельнічаць у вішнёвым забегу па беразе возера Кагальнае. У 12.30 гасцей запрашаюць на выставу-прэзент «Смак вішні — мой любімы густ».

Самая відовішчная, азартная і чаканая падзея фестывалю — забег вішнёвых смаўжоў. Ён збярэ маленькіх і вялікіх «трэнераў» на цэнтральнай гарадской плошчы ў 12.30. «Да нас ужо паступаюць заяўкі, глыбачане рыхтуюцца да забегу смаўжоў вельмі сур’ёзна. Напярэдадні спаборніцтвы ўпрыгожваюць сваіх „спартсменаў“ вішанькамі, стразамі, каб прэтэндэнт на перамогу нечым вылучаўся. На забегу яны падманваюць смаўжоў смачнымі — лісточкамі салаты, кветкамі дзьмухаўцоў, кавалачкамі агуркоў. І абавязкова апырскваюць іх вадой, каб „спрынтэры“ лепш слізгалі па паверхні», — расказала начальнік аддзела ідэалагічнай работы і па справах моладзі Глыбоцкага райвыканкама Людміла Карніловіч.

У 13.30 па традыцыі на фестывалі адбудзецца вішнёвае вяселле. Як правіла, словы на дарогу маладым даюць шлюбныя пары, якія некалькі гадоў таму мінулі сапраўды такі ж абрад і якіх згуртавала знакамітая глыбоцкая вішня — сакавітая, далікатная, мяккая і з лёгкай кіслінкай.

10-ты раз будуць спаборнічаць гарманісты, баяністы і акардэаністы. Галоўным прызам стане баян вішнёвага колеру. Людміла Карніловіч падзялілася, што часам вельмі няпроста знайсці інструмент менавіта такога адцення, таму можна лічыць, што пераможцу дастаецца эксклюзіў. У рамках фестывалю таксама пройдуць рэгіянальныя конкурсы галаўных убораў, па лозапляценні.

Увечары на цырымоніі закрыцця фестывалю правядуць аўкцыён, дзе жаданым лотам стане вішнёвы пірог. Апоўначы над горадам зазіхаціць святочны феерверк, а затым да гадзіны ночы жыхары і госці Глыбокага змогуць танцаваць на дыскатэцы.

Людміла Карніловіч адзначыла, што на фестываль прыедуць даўнія сябры з вішнёвай сталіцы Расіі — Уварава. Дэлегацыя з гэтага горада, дзе на свяце «Вішневарава» нядаўна пабывалі і глыбачане, прывязуць новыя нумары, каб парадаваць выступленнямі беларускіх «калег» і прыхільнікаў ягаднага фэсту. Таксама ў мерапрыемстве прымуць удзел творчыя калектывы з іншых рэгіёнаў Беларусі і Расіі, Грузіі, Латвіі, Арменіі, Індыі.