«Хачу прапанаваць у цэлым па гэтым напрамку расставіць усе кропкі над і. Нічога надзвычайнага, нічога незвычайнага і нічога непрывычнага. Фармат дакладаў Прэзідэнту — гэта работа, якая ідзе пастаянна ўжо даволі доўгі час. Нейкія даклады мы з вамі і вы, у прыватнасці, у сваіх сродках масавай інфармацыі асвятляеце, нейкія мы даём чыста тэматычна. Але гэта таксама вельмі важны працэс для таго, каб уся краіна чула і разумела, пра што дакладваюць Прэзідэнту і што ў выніку даручае Прэзідэнт. І, зразумела, ёсць даклады, пра якія мы не расказваем шырока ў сродках масавай інфармацыі», — адзначыла Наталля Эйсмант.
Пры гэтым, паводле яе слоў, менавіта такіх дакладаў значна больш, чым тых, якія асвятляюцца ў сродках масавай інфармацыі.
«Гэта тая работа, якую Прэзідэнт праводзіць пастаянна. Што датычыцца цяперашняга перыяду і некалькіх апошніх дзён. Вялізная камандзіроўка — 30 тысяч кіламетраў, якія пераадолеў Прэзідэнт, працуючы за межамі краіны, — звярнула ўвагу прэс-сакратар кіраўніка дзяржавы. — І знаходзячыся ў розных краінах свету, працуючы ў розных краінах свету, Прэзідэнт, зразумела, быў у курсе абсалютна ўсяго, што адбываецца. Па спецыяльнай мабільнай сувязі ён перыядычна размаўляў з рознымі службовымі асобамі. Але гэта, вядома, былі аператыўныя даклады, тое, што патрабавала ўвагі Прэзідэнта ў той ці іншы момант».
Наталля Эйсмант расказала, што, вярнуўшыся ў Беларусь пасля працяглай замежнай паездкі, Аляксандр Лукашэнка адразу ж паглыбіўся ў работу. «Яшчэ ў нядзелю вечарам Прэзідэнт працаваў і размаўляў па самых аператыўных тэмах з многімі людзьмі. Увесь панядзелак у Прэзідэнта быў уключаны рабочы пульт, Прэзідэнт працаваў, слухаў даклады розных службовых асоб. Я, зразумела, ведаю не ўсе, але дакладна ведаю, што вельмі доўга Прэзідэнт размаўляў з прэм’ер-міністрам (ён з’яўляецца старшынёй аргкамітэта Усебеларускага народнага сходу). Прэзідэнт заслухаў кіраўніцтва ўсіх асноўных сілавых структур і нашых ваенных ведамстваў. Мы разумеем, абстаноўка — гэта самае галоўнае. Кіраўніцтва палітычнага штаба. Дарэчы, прэм’ера не толькі па падрыхтоўцы да УНС Прэзідэнт слухаў, але і па ўсіх астатніх актуальных пытаннях», — прыадкрыла графік кіраўніка дзяржавы яго прэс-сакратар.
