Старт акцыі сёння дала Федэрацыя прафсаюзаў — прадстаўнікі нацыянальнага прафцэнтра, рэспубліканскіх камітэтаў галіновых прафсаюзаў, аб’ектаў уласнасці ФПБ займаюцца добраўпарадкаваннем розных аб’ектаў. У большасці гэта санаторыі і базы адпачынку.

Як адзначыў старшыня Федэрацыі прафсаюзаў Юрый Сянько, у бягучым годзе Федэрацыя прафсаюзаў запланавала больш як 350 мерапрыемстваў па добраўпарадкаванню, мадэрнізацыі на розных аб’ектах санаторна-курортнага і турыстычнага прызначэння. Усе гэтыя работы накіраваны на тое, каб стварыць больш сучасныя ўмовы для адпачывальнікаў, турыстаў — нашых грамадзян і замежных гасцей.

У цэлым жа абмежаванняў па маштабе і фармаце ўдзелу ў акцыі «Чыста! Праф! Саюз» няма. У кожным рэгіёне, арганізацыі, працоўным калектыве аб’екты для добраўпарадкавання выбіраюцца з улікам патрэбнасцей у тым ці іншым населеным пункце.

— Вялікая колькасць прадстаўнікоў галіновых прафсаюзаў, першасных прафсаюзных арганізацый ужо далучылася да гэтага руху. Толькі сёння каля 200 аб’ектаў ахоплена работамі па навядзенні парадку. У цэлым жа на працягу красавіка будзе праведзена больш за 1000 працоўных акцый, — расказаў лідэр нацыянальнага прафцэнтра.

Акрамя добраўпарадкавання санаторна-курортных аб’ектаў, прадстаўнікі прафсаюзаў будуць працаваць на знакавых і памятных месцах для беларусаў, прымуць удзел у пасадцы сквераў, алей, лясоў. У некаторых раёнах прафсаюзы будуць упарадкаваць тэрыторыю дзіцячых аздараўленчых лагераў, гарадскіх паркаў, культурных і сацыяльных аб’ектаў.

Як падкрэслілі ў нацыянальным прафцэнтры, ініцыятыва «Чыста! Праф! Саюз!» накіравана ў першую чаргу на тое, каб кожны мог унесці свой уклад у стварэнне зручнай, бяспечнай, сучаснай, прывабнай інфраструктуры для жыцця. Прыгажосць і чысціня нашай краіны — гэта ўжо нацыянальны брэнд. Але за гэтым стаіць вялізная праца беларусаў, якія ніколі не застаюцца ў баку ад грамадска важных спраў. А добраўпарадкаванне краіны — гэта тое, што заўсёды аб’ядноўвала людзей, працоўныя калектывы.