У Мінску дзяржпрадпрыемства са сферы энергетыкі наняло супрацоўнікаў прыватнай фірмы па дагаворах аўтстафінгу. Яны павінны былі выканаць будаўнічыя работы на аб’ектах беларускай энергасістэмы. Аднак высветлілася, што ў многіх выпадках рабочыя ўвогуле не прыязджалі на аб’екты. Пры гэтым дырэктар прыватнай фірмы ўпісваў у справаздачы лжывыя даныя аб тым, колькі гадзін адпрацавалі яго супрацоўнікі. З-за гэтага дзяржаўная кампанія неабгрунтавана перавяла фірме больш за 200 тыс. рублёў.

Пры апытанні асобных працаўнікоў высветлілася, што яны нават не былі ў тых гарадах, дзе вялося будаўніцтва. Больш за тое, выяўлены выпадкі, калі аднаго і таго ж спецыяліста запісвалі як працуючага адначасова на розных аб’ектах у розных гарадах.

На ўласніка прыватнай кампаніі пачалі крымінальную справу. Неабгрунтавана атрыманыя грашовыя сродкі вернуты дзяржпрадпрыемству.