Сёння пройдуць апошнія канцэрты, якія завершаць маштабную праграму фестывалю. У 18.00 у абласной філармоніі адбудзецца сольны канцэрт у стылі фламенка. Расійскі музычны праект Etno-Flamenco прадставіць гарачыя іспанскія рытмы, якія дапоўніць прыцягальны і яркі танец.

Віцебскі дзяржаўны музычны каледж ім. І.І.Салярцінскага прыме ў 18.00 лаўрэатаў міжнародных конкурсаў, студэнтаў Расійскага інстытута тэатральнага мастацтва, удзельнікаў адукацыйнага праекта, які праходзіць на фестывалі, «Вакальная лабараторыя».

Сольную праграму «Голас сфер» прадставіць у канцэртнай зале «Віцебск» ДзіДзюЛя. Прыхільнікаў інструментальнай музыкі запрашаюць атрымаць асалоду ад выступлення ў 19.00.

Містычны трылер «Мёртвыя душы» ўбачаць у 19.00 гледачы Нацыянальнага акадэмічнага драматычнага тэатра ім. Якуба Коласа. Пастаноўку ў фестывальнай сталіцы пакажа маскоўскі «Тэатр на Паўднёвым Захадзе». Пасля спектакля гледачы і журналісты змогуць паразмаўляць з акцёрамі і задаць ім пытанні.

У 21.30 завершыць праграму XXXIV Міжнароднага фестывалю мастацтваў «Славянскі базар у Віцебску» гала-канцэрт зорак шансона. Жыхары і госці абласнога цэнтра пачуюць любімых выканаўцаў і групы — Віктара Рыбіна і Наталлю Сянчукову, «Лесапавал», Ірыну Круг, Вікторыю Алешку, Кацярыну Галіцыну, Жэку, Раду Рай, «Кодзі» і інш. Артысты традыцыйна створаць на сцэне Летняга амфітэатра душэўную атмасферу, ад якой хочацца проста спяваць.