52-гадовы Мішэль Дзюпон з рэгіёна Авернь выпадкова знайшоў золата падчас агляду сваёй зямлі. «Я проста правяраў зямлю і ўбачыў дзіўны бляск у ручаі. Калі пачаў капаць — не паверыў сваім вачам», — расказаў ён. Паводле папярэдніх ацэнак, пад яго фермай можа знаходзіцца да 150 тон золата агульным коштам каля 3,5 мільярда еўра.

Пры гэтым сам Дзюпон не можа прысвоіць сабе ні грама. Як толькі стала вядома аб залатой рудзе на ўчастку, французскія ўлады аператыўна ўмяшаліся, забараніўшы фермеру здабычу каштоўнага металу. Згодна з французскім заканадаўствам, нетры належаць дзяржаве, нават калі знаходзяцца на прыватнай зямлі. Для пачатку распрацоўкі спатрэбяцца шматгадовыя экалагічныя экспертызы і ўзгадненні.

«Мне растлумачылі, што нічога нельга рабіць да завяршэння ўсіх праверак», — са шкадаваннем прызнаў фермер. Пры гэтым ён адзначае, што яго жыццё ўжо змянілася: з’явілася чарга з ахвочых купіць суседнія з яго фермай землі.

Мясцовыя жыхары падзяліліся ў меркаваннях: адны асцерагаюцца, што прамысловая здабыча разбурыць экалогію маляўнічага рэгіёна, а іншыя спадзяюцца на працоўныя месцы і эканамічны рост.

Раней паведамлялася, што ўлады Польшчы атрымалі ліст ад загадкавага ананіма, які заявіў, што раскрыў таямніцу «залатога цягніка нацыстаў». Аўтар напісаў, што знайшоў «замаскіраваныя вагоны цягніка», у якім захоўваюцца выкрадзеныя нацыстамі ў 1930-1940-х гадах у Еўропе каштоўнасці і творы мастацтва.