Згодна з ініцыятывай, інтэрнэт-платформы будуць абавязаныя на працягу гадзіны выдаляць матэрыялы, якія ўтрымліваюць заклікі да ўчынення тэрактаў, паўстання або ўзброенай барацьбы супраць дзяржавы альбо асобных груп насельніцтва. У выпадку невыканання патрабавання ўлады змогуць дамагацца блакіравання сацыяльных сетак або іх выключэння з пошукавай выдачы.

Папраўка таксама прадугледжвае пашырэнне паўнамоцтваў дзяржаўнай платформы Pharos, якая займаецца выяўленнем супрацьпраўнага кантэнту ў інтэрнэце. Сацсеткам прапануецца даць 24 гадзіны на выдаленне публікацый, якія заклікаюць да забойстваў, гвалту, крадзяжоў і знішчэння маёмасці, калі такія матэрыялы могуць прывесці да сур'ёзнага парушэння грамадскага парадку.

Ініцыятыва падрыхтаваная пасля масавых беспарадкаў, якія суправаджалі пратэсныя акцыі 17 кастрычніка. У панядзелак прэзідэнт Францыі Эмануэль Макрон падчас паездкі ў Марсэль заявіў, што сацыяльныя сеткі выкарыстоўваліся для каардынацыі дзеянняў і збору ўдзельнікаў у месцах нападаў і марадзёрства.