Праграма рабочага візіту насычаная. Перш за ўсё наведванне прадпрыемстваў розных галін і вывучэнне на практыцы структуры і функцыянавання сістэмы сацыяльнага партнёрства, эфектыўных механізмаў абароны працоўных правоў работнікаў у краіне, стварэння камфортных і бяспечных умоў працы на прадпрыемствах. Акрамя таго, прадстаўнікоў егіпецкіх прафсаюзаў зацікавіў вопыт арганізацыі водпуску і вольнага часу для работнікаў і іх сем’яў — напрамак, які з’яўляецца важнай часткай сацыяльнай палітыкі беларускіх прафсаюзаў.

Трэба адзначыць, што актыўнае ўзаемадзеянне прафсаюзаў дзвюх краін прадаўжаецца ўжо больш як пяць гадоў. За гэты час быў наладжаны канструктыўны дыялог, заключаны пагадненні аб супрацоўніцтве. Дарэчы, у рамках бягучага візіту было прадоўжана пагадненне: вынікам сустрэчы стала падпісанне новага дакумента аб далейшым супрацоўніцтве паміж Беларускім прафсаюзам работнікаў жыллёва-камунальнай гаспадаркі і Усесаюзным прафсаюзам работнікаў камунальных службаў Егіпта.

Падпісанне пагадненняў адбылося на базе ДВА «Гаррамаўтадар Мінгарвыканкама». Дэлегацыя таксама пазнаёмілася са спецыфікай дзейнасці спецыялізаванага прадпрыемства, якое на працягу 65 гадоў забяспечвае жыццядзейнасць сталіцы.

Як адзначыў старшыня Усесаюзнага прафсаюза работнікаў камунальных службаў Егіпта Хешам Ахмед Фуад Ахмед, гэта яго другі візіт у Беларусь.

«Самае важнае для нас — гэта абмен вопытам з беларускім народам, у тым ліку ў сферы жыллёва-камунальных паслуг, і ўстанаўленне дзелавых сувязяў паміж дружалюбнымі краінамі. Мы хочам паглыбіць нашы адносіны, вывучыць вашу практыку і падзяліцца вопытам», — дадаў Хешам Ахмед Фуад Ахмед.

У сваю чаргу старшыня Беларускага прафсаюза работнікаў жыллёва-камунальных службаў Юрый Дарагакупец выказаў намер і надалей падтрымліваць і развіваць супрацоўніцтва з замежнымі калегамі.

«У нас агульная мэта — працягваць будаваць сяброўскія адносіны і абменьвацца перадавым вопытам, які ёсць як у беларускага, так і ў егіпецкага бакоў. Гэта абмен дэлегацыямі, азнаямленне з работай прадпрыемстваў галіны, зносіны з прадстаўнікамі прафсаюзнага руху. Мы знаходзім пэўныя кропкі судакранання і кожны раз даведаемся нешта новае для сябе», — сказаў Юры Дарагакупец.

У цэлым праграма візіту пабудавана з акцэнтам на практычную частку. Госці з Егіпта таксама наведалі шэраг арганізацый энергетычнай і газавай прамысловасці. Напрыклад, на ўнітарным прадпрыемстве «МІНГАЗ» замежныя калегі прадставілі работу абноўленага цэнтра абслугоўвання кліентаў, лічбавыя рашэнні, якія спрашчаюць падрыхтоўку дакументаў, а таксама інструменты, якія значна павышаюць хуткасць і якасць абслугоўвання.

Акрамя таго, вядучая прафсаюзная арганізацыя сталічных газавікоў прэзентавала свой вопыт грамадскага кантролю за выкананнем працоўнага заканадаўства, прадэманстраваўшы эфектыўныя механізмы прадухілення вытворчых траўм і павышэння культуры бяспекі.

Алена КРАВЕЦ