Беларусь і Іран — даўнія сябры і надзейныя партнёры, адзначыў Раман Галоўчанка. «Вельмі радуе, што ў апошнія гады мы назіраем інтэнсіўныя кантакты на ўсіх узроўнях — ад Прэзідэнцкага да экспертнага. Вельмі значнымі для развіцця нашых адносін сталі візіт Прэзідэнта Беларусі ў Іран у сакавіку 2023 года, а таксама нядаўняя сустрэча на палях саміту БРІКС у кастрычніку мінулага года», — адзначыў ён.

Узаемадзеянне і ў эканамічнай сферы арганічна падцягваецца да ўзроўню палітычных кантактаў, дадаў прэм’ер-міністр. «Пачынаючы з 2022 года мы назіраем устойлівы рост аб’ёмаў узаемнага гандлю. Калі ў 2022 годзе ён вырас у тры разы ў адносінах да папярэдняга года, ён павялічыўся і па выніках 2023 года. Упэўнены, што і ў 2024 годзе наш тавараабарот прадэманструе рост», — падкрэсліў кіраўнік урада.

Неабходна падтрымліваць дынаміку кантактаў, упэўнены ён. «Мы пацвярджаем гатоўнасць прыняць прэзідэнта Ірана Масуда Пезешкіяна з афіцыйным візітам у гэтым годзе», — заявіў Раман Галоўчанка.

Сёння таксама адбылося 17-е пасяджэнне змяшанай беларуска-іранскай міжурадавай камісіі па пытаннях эканамічнага супрацоўніцтва, па выніках якой Беларусь і Іран узгаднілі план далейшага супрацоўніцтва на 2025 год па перспектыўных напрамках. Дакумент уключае ўзаемадзеянне ў 2025 годзе па шырокім спектры напрамкаў, у тым ліку ў сферы гандлю і прамысловасці, сельскай гаспадаркі, электраэнергетыкі, транспарту, аховы здароўя, адукацыі, спорту і інш.

Паводле слоў Рамана Галоўчанкі, міжурадавая камісія — гэта той інструмент, які павінен трансфармаваць палітычныя дамоўленасці ў канкрэтныя эканамічнае праекты ў інтарэсах нашых краін. «Падчас візіту Кіраўніка дзяржавы быў падпісаны важны стратэгічны дакумент-дарожная карта ўсебаковага супрацоўніцтва на 2023-2026 гады. Задача камісіі — не толькі адсочваць выкананне мерапрыемстваў, закладзеных у гэтую карту, але і ініцыяваць развіццё новых праектаў па напрамках, якія ўключаны ў яе», — сказаў на заканчэнне Раман Галоўчанка і дадаў: «беларускі бок настроены на доўгатэрміновае і ўстойлівае партнёрства з Іранам».

Фота БелТА