Як нагадаў Прэм’ер-міністр Раман Галоўчанка, работа над гэтым дакументам вялася з 2023 года: 

— Прадстаўленая да разгляду Стратэгія будзе служыць базісам для праграмы сацыяльна-эканамічнага развіцця на чарговы пяцігадовы перыяд, канцэпцыя якой будзе разгледжана крыху пазней, папярэдне ў красавіку. 

Што з сябе ўяўляе дакумент? 

Па словах кіраўніка ўрада, ён вызначае напрамкі развіцця краіны на 15-гадовым гарызонце і кропкі канцэнтрацыі рэсурсаў для дасягнення пастаўленых мэт: 

— Дакумент павінен адначасова забяспечваць нацыянальную бяспеку дзяржавы, а таксама ствараць умовы для ўстойлівага развіцця і дасягнення высокіх стандартаў жыцця насельніцтва. 

Раман Галоўчанка акцэнтаваў увагу на тым, што свет сёння ідзе па шляху дэглабалізацыі: 

— Як вы бачыце, ідуць так званыя гандлёвыя войны, рынкі зачыняюцца, дамінуючай стратэгіяй становіцца пратэкцыянізм. Ствараюцца новыя блокі, якія актыўна фармуюць свае новыя стандарты і правілы, укараняюць асновы для развіцця ўласных тэхналогій. Улічваючы структуру нашай эканомікі, становіцца відавочным, што для нас ключавым з’яўляецца паскоранае развіццё сферы інавацый, укараненне лічбавых тэхналогій ва ўсе сферы жыццядзейнасці дзяржавы. Таму што адказваць на глабальныя ўжо наяўныя выклікі і тыя, якія ўзнікнуць у бліжэйшы час традыцыйнымі мерамі, ужо не вельмі атрымліваецца. 

На яго думку, па сутнасці, патрабуецца комплексная трансфармацыя не толькі эканомікі, але і мыслення, якое грунтуюцца на выкарыстанні мадэляў кіравання вялікімі дадзенымі, штучным інтэлектам, нейрасеткамі, адытыўнымі тэхналогіямі і г.д. Адпаведна, патрабуецца і перагляд падыходаў да падрыхтоўкі кадраў для новай эканомікі. 

— У сувязі з гэтым хацелася б у дакладзе асобна пачуць, якія доўгатэрміновыя падыходы да фарміравання інтэлектуальнай эканомікі закладзены ў праекце Стратэгіі, — нацэліў Прэм’ер-міністр. — Ці дастаткова яны для таго, каб выйсці на неабходны ўзровень канкурэнтаздольнасці і забяспечваць устойлівае і якаснае развіццё? 

Таксама ён звярнуў увагу, што ёсць і іншыя напрамкі работы, якія знаходзяцца ў парадку дня, маюць глабальнае значэнне і патрабуюць да сябе пільнай увагі: 

— Яны не новыя: гэта пытанні дэмаграфіі, экалогіі і балансу рэсурсаў: як мы будзем стабілізаваць колькасць насельніцтва, забяспечваць устойлівае дэмаграфічнае развіццё; якія меры будуць прыняты для рэалізацыі канцэпцыі актыўнага даўгалецця і развіцця так званай сярэбранай эканомікі (арыентаванай на пэўную долю пажылых людзей у грамадстве)? 

Раман Галоўчанка адзначыў, што мэтавымі арыенцірамі ў экалагічнай сферы павінны стаць паўсюднае ўкараненне прынцыпаў цыркулярнай эканомікі і развіццё «зялёнай» інфраструктуры. 

— У Стратэгіі прыведзены індыкатары, якія плануюцца дасягнуць да 2040 года. Лічбы досыць амбіцыйныя. Рост валавога ўнутранага прадукту, інвестыцый і экспарту практычна ў два разы. Долі лічбавай эканомікі ў тры разы, долі высокатэхналагічных вытворчасцяў да 50%, працягласць жыцця да 80,5 гадоў і шэраг іншых, — паведаміў ён і прапанаваў удзельнікам далажыць, як будзе арганізавана работа па дасягненні гэтых мэт і задач. — Ці хопіць, па вашай ацэнцы, на гэта рэсурсаў, як чалавечых, так тэхналагічных і фінансавых. Асабліва важна, ці гатовая «вертыкаль» да іх рэалізацыі і наколькі сістэмна ў гэтую працу ўцягнутыя рэгіёны і дзяржорганы. Таму што вельмі важна, каб гэтая Стратэгія стала сапраўды рабочым дакументам і кіраўніцтвам да дзеяння для кожнага кіраўніка на ўсіх узроўнях.