У чэрвені 33-гадовы гамельчанін атрымаў у месенджары паведамленне ад карыстальніка з фатаграфіяй і прозвішчам дырэктара арганізацыі, у якой ён працуе. Ілжэкіраўнік сказаў, што КДБ нібыта правярае галоўнага бухгалтара фірмы з-за распаўсюджвання пашпартных дадзеных работнікаў, а на самога мужчыну ўжо аформлена некалькі крэдытаў.

Далей у месенджары гамельчаніну патэлефанаваў ілжэсупрацоўнік Камітэта дзяржбяспекі. Ён растлумачыў, што для пагашэння пазык мужчына павінен аформіць крэдытныя дагаворы на такія ж сумы і перавесці грошы на спецыяльныя рахункі. Жыхар Гомеля ўзяў у розных банках тры крэдыты і перавёў аферыстам каля Br64 тыс. Мужчыну загадалі чакаць позву на допыт. Не дачакаўшыся выкліку, ён зразумеў, што яго падманулі і звярнуўся ў міліцыю. 

1 ліпеня ад падобных дзеянняў махляроў ледзь не пацярпела 33-гадовая жыхарка Гомеля. Яна атрымала паведамленне нібыта ад намесніка генеральнага дырэктара па ідэалогіі. Карыстальнік з аватаркай ідэолага раказаў, што бухгалтар фірмы прадаў персанальныя дадзеныя супрацоўнікаў. Затым ёй патэлефанавалі ілжэсупрацоўнікі КДБ і Нацбанка. Жанчыну пераканалі, што на яе імя адкрыты разліковы рахунак, з якога спрабуюць перавесці грошы на тэрыторыю Украіны. Таксама паведамілі пра нібыта аформленыя на яе крэдыты. 

Для анулявання неіснуючага пазыкі жанчына падала ў банк заяўку на «сустрэчны» крэдыт. Аднак пазней гамельчанка стала сумнявацца ў праўдзівасці гісторыі. Нягледзячы на забарону куратара, яна патэлефанавала ідэолагу прадпрыемства і спытала пра атрыманыя паведамленні. Працаўніца даведалася пра падман і пазбегла фінансавых страт.