Прэзідэнт Беларусі Аляксандр Лукашэнка падпісаў закон «Аб змяненні кодэксаў па пытаннях адміністрацыйнай адказнасці». Дакумент прадугледжвае адміністрацыйную адказнасць пастаўшчыкоў і гандлёвых сетак за невыкананне абавязкаў па пастаўцы садавінагароднінай прадукцыі. Аб гэтым БелТА паведамілі ў прэс-службе кіраўніка дзяржавы.
- Як паведамлялася, раней кіраўніком дзяржавы быў падпісаны ўказ «Аб асаблівасцях пастаўкі садавінагароднінай прадукцыі для рэспубліканскіх дзяржаўных патрэб», накіраваны на тое, каб забяспечыць стабільнасць на спажывецкім рынку і наяўнасць у гандлёвых аб’ектах агародніны, асабліва ў міжсезонны перыяд.
Указам, у прыватнасці, вызначаны механізм прадастаўлення гандлёвым сеткам крэдытаў на льготных умовах для ўнясення авансу за 30 працэнтаў плодаагародніннай прадукцыі, якая закладваецца па дзяржзаказу пад патрэбнасці сетак. Крэдыты можна будзе ўзяць у беларускіх рублях з выплатай працэнтаў за карыстанне імі ў памеры 3 працэнты гадавых.Акрамя таго, для пастаўшчыкоў быў устаноўлены абавязак забяспечыць пастаўку для гандлёвых сетак садавінагароднінай прадукцыі.
Такі комплекс мер прыняты на фоне нашумелай апошнім часам тэмы аб нібыта недахопе бульбы ў продажы ў магазінах. Прыводзячы гэты прыклад з бульбай, Прэзідэнт на адной з нарад тлумачыў адказным службовым асобам, што павінна быць у полі іх зроку ў плане кантролю. «Я прыводзіў прыклад нядаўна па гандлю, — расказаў кіраўнік дзяржавы на нарадзе з кіраўніцтвам Адміністрацыі Прэзідэнта 12 чэрвеня. — Пачалі жартаваць з гэтай бульбай. Я здымаю трубку: «Герасімаў (старшыня КДК. — Заўвага БЕЛТА), разбярыся і далажы! Разам з былым прэм’ерам. Галавою адкажаце». Пачалі разбірацца — з буйнымі сеткамі. Прыходзіць, а там бульбы — дзяваць няма куды. Яна ў іх ляжыць на складзе. Чаму не на прылаўку? Палітыка. Трэба паказаць, што вось улады задушылі цэнамі да такой ступені, што жыць далей немагчыма. Гэта значыць наступілі на болевую кропку гэтым гандлярам».
