Супрацоўнікі і спартсмены АБФФ, трэнеры і гульцы нацыянальнай і юнацкай (U-16) зборных па футболе, а таксама жаночай зборнай каманды (WU-19) прайшлі па залах галоўнай палітычнай пляцоўкі краіны ў Дзень народнага адзінства. 

Пачуцці гонару, адказнасці, хвалявання

Спорт аб’ядноўвае — у гэтым яго асаблівая сіла. Таму, мабыць, невыпадкова, што экскурсія для нашых футбалістаў у Палац Незалежнасці прайшла менавіта 17 верасня, у Дзень народнага адзінства. І на полі, і на трыбунах не важна, адкуль ты родам і колькі табе гадоў: у зборную уваходзяць ураджэнцы розных куткоў нашай дзяржавы, а перажывае за яе ўся краіна.

Да таго ж, экскурсія адбылася напярэдадні адказнага перыяду: ужо 21 верасня пачынаецца вучэбна-трэніровачны збор нацыянальнай зборнай па падрыхтоўцы да Лігі нацый УЕФА. Але і гэта не апошняя нагода для візіту Палаца Незалежнасці, бо гэты год для беларускага футбола — юбілейны. У 2026 годзе краіна адзначае 115-годдзе з дня афіцыйнага нараджэння гульні ў Беларусі. 

Па словах старшыні АБФФ Яўгена Булойчыка, абавязак кожнага беларуса — пры магчымасці пабываць у Палацы Незалежнасці:

— Гэта палітычны храм нашай краіны, дзе прымаюцца ключавыя, складаныя рашэнні ў імя росквіту нашай дзяржавы. І знаходзіцца сёння тут у гэты дзень, у свята — гэта асаблівыя пачуцці — гонару, адказнасці, хвалявання. Мы ўсе будзем рабіць для таго, каб беларускі футбол паспяхова развіваўся, дабіваўся высокіх поспехаў і такім чынам уносіў свой уклад ва ўмацаванне народнага адзінства.

«У нас вераць, хочуць нас бачыць»

Яўген Булойчык таксама адзначыў: кожны чалавек пасля экскурсіі ў такое значнае месца будзе настроены працаваць на карысць сваёй Радзімы. Для спартсменаў наведванне Палаца яшчэ і стала магчымасцю пераключыцца ад трэніровачнага працэсу і зірнуць на сваю дзейнасць больш шырока. Бо важна не толькі падтрымліваць фізічную форму, але і захоўваць устойлівы эмацыйны настрой. А знаёмства з месцам, дзе прымаюцца лёсавызначальныя рашэнні для ўсёй краіны, надае ўпэўненасці і нагадвае аб тым, што за кожным выступленнем нашых спартсменаў стаіць падтрымка беларусаў.

Гэта адзначыў і галоўны трэнер нацыянальнай зборнай Беларусі па футболе Віктар Ганчарэнка. Па яго словах, каманда і без таго не мае права выступаць дрэнна, а пасля візіту сюды з’яўляецца яшчэ адзін, дадатковы стымул. Трэнер падкрэсліў: у моманты, калі даводзіцца цяжка, футбалісты павінны ўсведамляць, што за іх спінай стаіць уся краіна і яе людзі. «Найперш мы павінны быць на полі камандай, дзейнічаць як адзінае цэлае. Лічу, сёння ў нашай каманды выдатны баланс паміж абаронай і атакай, а галоўнае — правільны настрой і жаданне», — падзяліўся Віктар Ганчарэнка. 

«Вельмі прыемна адчуваць, што нашая краіна нас падтрымлівае»

У ходзе экскурсіі госці даведаліся аб тым, як ствараўся інтэр’ер Палаца, якія матэрыялы выкарыстоўваліся пры аздабленні, якія сімвалы закладзены ў афармленні залаў. Увогуле, практыка экскурсій, якія рэгулярна праходзяць у гэтых сценах, пераканаўча даказвае: абыякавых сярод гасцей не знаходзіцца. Маштабнае збудаванне з яго параднымі заламі і багатым унутраным убраннем нязменна робіць моцнае ўражанне на кожнага, хто аказваецца ўнутры. І гульцы нацыянальнай зборнай не выключэнне:

— Уражанні вельмі станоўчыя, — падзяліўся Захар Волкаў, гулец нацыянальнай зборнай Беларусі па футболе, дадаўшы, што, як спартсмен, удзячны за дзяржаўную падтрымку футбола: — І сёння гэта паказвае ўжо тое, што мы тут знаходзімся, што ў нас вераць, хочуць нас бачыць. Таму мы хочам адплаціць за гэта добрымі вынікамі ў наступных гульнях.

Сёння пад эгідай Асацыяцыі «Беларуская федэрацыя футбола» ў афіцыйных турнірах выступае каля 22 тысяч спартсменаў розных узростаў. І асаблівы акцэнт у развіцці віду спорту АБФФ робіць на моладзь.

«Гуляць у складзе нашай зборнай вельмі важна і пачэсна — гэта каштоўны досвед, выходзіш на поле з хлопцамі з іншых краін і гарадоў. Вось мы нядаўна ездзілі на Кубак Юрыя Марозава і вельмі добра праявілі сябе, — расказаў гулец зборнай Беларусі U-16 па футболе Арсеній Аплевіч. — Мы кожныя месяц-два ездзім на розныя турніры ў іншыя краіны. Вельмі прыемна заўсёды адчуваць, што нашая краіна нас падтрымлівае». 

Нагадаем: 30 жніўня юнацкая зборная Беларусі (U-16) атрымала перамогу на Кубку Юрыя Марозава. Дарэчы, хлопцы ўвесь турнір прайшлі выключна з перамогамі. У фінальным паядынку беларусы разграмілі сербскую «Црвену Звезду» (U-16), згуляўшы 4:0. А пасля ўзнагароджання юныя футбалісты запісалі відэавіншаванне для Прэзідэнта — якраз у гэты дзень у яго быў дзень нараджэння.

«Натхняе тое, што нам дасталася такая магчымасць»

Футбол не выпадкова называюць гульнёй мільёнаў — з гэтым сцвярджэннем згодна Марыя Купрыянчык, гулец жаночай зборнай каманды WU-19. На яе думку, гэта адна з самых масавых і папулярных гульняў: у яе мноства гульцоў і балельшчыкаў, і часам нават тыя, хто з футболам не звязаны, заходзяць паглядзець той ці іншы матч — проста таму, што гэта цікава. Цікавай дзяўчына лічыць і экскурсію ў Палац Незалежнасці: 

— Уражваюць маштабы, інтэр’еры. Для нас вялікі гонар, што нашу каманду запрасілі пабываць тут менавіта ў гэты дзень, мы ўдзячныя за гэта, — падзялілася думкамі Марыя Купрыянчык. — Натхняе тое, што нам дасталася такая магчымасць — значыць, мы гэтага вартыя, значыць, трэба паказваць свае дасягненні і свой узровень далей, імкнуцца расці. 

І сапраўды: наведванне Палаца Незалежнасці стала дадатковым стымулам для далейшай працы, каб надыходзячыя старты прынеслі нашым спартсменам новыя перамогі. Каляндар найбліжэйшых матчаў ужо вядомы: першую гульню нацыянальная зборная правядзе 26 верасня ў г. Тыране супраць каманды Албаніі. Потым, 29 верасня, беларусы сустрэнуцца са зборнай Фінляндыі ў Хельсінкі. 

І хоць наперадзе — напружаная падрыхтоўка да гульняў, як прызналіся самі хлопцы і дзяўчаты, у іх ёсць матывацыя выступіць годна: каб краіна, якая адчыніла перад імі дзверы сваёй галоўнай палітычнай пляцоўкі, магла ганарыцца сваімі атлетамі. Бо агульная мэта нараджае агульную адказнасць, а адзінства пачынаецца з павагі і любові да роднай зямлі.

Аміна НАЗАРАВА

Фота БелТА