«Па ініцыятыве Прэзідэнта Рэспублікі Беларусь праводзім актыўную работу над пралангацыяй дзеючай стратэгіі калектыўнай бяспекі АДКБ, якая была прынята на перыяд да 2025 года. Яе сутнасць — захаваўшы найбольш важныя палажэнні дзеючага дакумента, прывесці яго змест у адпаведнасць з патрэбай эфектыўнага рэагавання на найноўшыя выклікі і пагрозы ў сферы калектыўнай бяспекі дзяржаў — членаў арганізацыі», — сказаў Імангалі Тасмагамбетаў.

У гэтым кантэксце плануецца прадоўжыць нарошчванне баявога патэнцыялу войскаў Калектыўных сіл АДКБ, у тым ліку шляхам іх аснашчэння сучаснымі сістэмамі разведкі, радыёэлектроннай барацьбы і інш. «Маецца на ўвазе ўдасканаленне праграм падрыхтоўкі ваенных кадраў для Узброеных Сіл дзяржаў — членаў АДКБ з улікам сучасных дасягненняў ваеннай навукі, тэхнікі і перадавога вопыту», — растлумачыў ён.

Генеральны сакратар АДБК заўважыў, што Ялцінска-Патсдамская сістэма міжнародных адносін, якая сфарміравалася па выніках заканчэння Другой сусветнай вайны, сёння сур’ёзна разбалансавана. Разбураны Дагавор аб звычайных узброеных сілах у Еўропе, які дзесяцігоддзямі служыў краевугольным каменем еўрапейскай бяспекі. Асобныя еўрапейскія палітыкі вядуць справу да мілітарызацыі эканомікі, заяўляюць аб магчымасці ўмацавання ўласнай бяспекі за кошт новых сістэм узбраення, у тым ліку набыцця свайго або размяшчэння на сваёй тэрыторыі атамнай зброі дзяржаў ядзернага клуба. 

«Мы фіксуем рост колькасці рэгіянальных канфліктаў, адзначаем з’яўленне якасна новых выклікаў і пагроз бяспекі саюзнікаў. Асаблівую заклапочанасць выклікае набліжэнне зон нестабільнасці непасрэдна да граніц дзяржаў — членаў АДКБ. Спакусы прыняць на ўзбраенне новыя віды высокаразбуральных сістэм становяцца рэальнасцю. Абаронныя выдаткі ў свеце б’юць гістарычныя рэкорды. Адбываецца актывізацыя ваенна-касмічнай дзейнасці, з’яўляюцца новыя віды смяротных аўтаномных сістэм», — адзначыў Імангалі Тасмагамбетаў.

Паводле яго слоў, Інтэрнэт актыўна выкарыстоўваецца для ўздзеяння на ўнутрыпалітычную абстаноўку ў суверэнных краінах, нанясення шкоды іх эканамічным, ваенным і іншым інтарэсам. Усё больш актыўна ў ваенных мэтах выкарыстоўваецца штучны інтэлект і саманавучальныя сістэмы. Акрамя складаных ваенных аспектаў бяспекі, своечасовых скаардынаваных дзеянняў патрабуе рост пагроз у біялагічнай, міжнароднай, інфармацыйнай і іншых сферах.

Працягвае захоўвацца пагроза міжнароднага тэрарызму і звязанага з ім экстрэмізму, наркатрафіку, трансгранічнага перамяшчэння баевікоў, нелегальных фінансавых аперацый, якія таксама патрабуюць пільнай увагі з боку саюзнікаў у АДКБ.

Генеральны сакратар АДБК падкрэсліў: у арганізацыі, якую ён узначальвае, станоўчы паслужны спіс. У зоне адказнасці, гэта значыць у граніцах дзяржаў — членаў АДКБ, за больш чым 30 гадоў існавання Дагавора аб калектыўнай бяспецы ўдаецца прадухіляць або істотна змякчаць крызісныя сітуацыі. Зразумела, прыярытэт, як і раней, аддаецца прэвентыўным палітыка-дыпламатычным метадам урэгулявання міждзяржаўных супярэчнасцяў. Адначасова працягваецца ўдасканаленне сістэмы крызіснага рэагавання АДКБ.