Рэакцыя на карупцыйныя злачынствы павінна быць жорсткай і прынцыповай, адзначыў генеральны пракурор Беларусі Андрэй ШВЕД перад пасяджэннем Рэспубліканскай каардынацыйнай нарады па барацьбе са злачыннасцю і карупцыяй, на якой разглядалася пытанне эфектыўнасці мер, што прымаюцца дзяржаўнымі органамі і іншымі арганізацыямі па процідзеянні карупцыі, паведаміла БелТА.

«Усім відавочна, што чыноўнік, які павяз у карупцыі і думае толькі аб нажыве, не будзе абараняць дзяржаву. Ён не будзе думаць аб простых людзях», — заўважыў Андрэй Швед, падкрэсліўшы, што такія праявы патрабуюць, як адзначаў Прэзідэнт, жорсткай, прынцыповай рэакцыі.

Генпракурор указаў на адсутнасць недатыкальных. Да крымінальнай адказнасці прыцягваюцца кіраўнікі міністэрстваў і ведамстваў. «І міністры, і намеснікі міністраў, і кіраўнікі буйных прадпрыемстваў», — удакладніў ён, дадаўшы, што грамадства аб гэтым інфармуецца.

  «На жаль, сёння ў аператыўнай распрацоўцы знаходзяцца матэрыялы адносна такой катэгорыі асоб», — сказаў ён.

• Барацьба з карупцыяй — прыярытэтны кірунак работы не толькі праваахоўных органаў, але і ўсяго грамадства, лічыць генпракурор. Прэзідэнт неаднаразова падкрэсліваў той факт, што беларускія людзі атрымалі ў свой час вакцыну нецярпімасці да праяў карупцыі. «Наша задача з пункту гледжання ў тым ліку прафілактыкі — імунітэт беларускага грамадства, нецярпімасць падтрымліваць на самым высокім узроўні», — адзначыў Андрэй Швед.

Паводле яго слоў, апошнія некалькі гадоў узровень злачыннасці карупцыйнай накіраванасці знізіўся прыкладна на трэць. Выяўляецца ў сярэднім крыху больш за тысячу злачынстваў, звязаных з карупцыяй. Да крымінальнай адказнасці прыцягваюцца ад 820 да 850 службовых асоб за год.

Разам з тым аб самазаспакаенні гаворкі быць не можа, падкрэсліў генпракурор. Кіраўнік нагляднага органа звярнуў увагу на прафілактыку, адзначыўшы наяўнасць недахопаў у рабоце з падборам і расстаноўкай кадраў. На гэтыя пытанні звяртаў увагу і кіраўнік дзяржавы.

Андрэй Швед паведаміў, што найбольшая колькасць злачынстваў карупцыйнай накіраванасці ўчыняецца ў сельскай гаспадарцы, прамысловасці, будаўніцтве, гандлі. Адзначаючы іншыя тэндэнцыі, генпракурор акцэнтаваў увагу на тым, што формы і метады злачыннай дзейнасці ўдасканальваюцца. Усё часцей, па матэрыялах крымінальных спраў, фіксуюцца факты атрымання хабару ў крыптавалюце, з выкарыстаннем электронных кашалькоў. Злачынцы спрабуюць канспіраваць сваю дзейнасць, прымяняюць найноўшыя сродкі, у тым ліку шыфраванні ў месенджарах. Але праваахоўныя органы заўсёды на крок наперадзе ў гэтым пытанні.