«Мы выдатна ведаем, пра гэта мне ўжо далажылі, што гэта было зроблена ўсё як інфармацыйная нагода атрымаць грошы ад Еўрапейскага Саюза самімі латышамі», — сказаў кіраўнік дзяржавы. 

Аляксандр Лукашэнка назваў глупствам тое, што «стварылі латвійцы на мяжы». «Мы да гэтага не маем ніякага дачынення, што мы там (нібыта. — Заўв. БелТА) праніклі на іх тэрыторыю — людзі ў масках, вайскоўцы — кагосьці схапілі, захапілі або заштурхнулі туды нейкую групу мігрантаў. Большага глупства не прыдумаеш», — сказаў кіраўнік дзяржавы.

«Падобныя аперацыі з заходам на тэрыторыю суседняй дзяржавы немагчымыя без узгаднення з Прэзідэнтам. Са мной падобныя рэчы не ўзгадняліся. А, значыць, і не праводзіліся. Я гэта ведаю дакладна. Таму што ваша (кіраўніцтва беларускіх сілавых структур. — Заўв. БелТА) выканаўчасць абсалютна не падвяргаецца сумненню», — заявіў Аляксандр Лукашэнка.

Кіраўнік дзяржавы звярнуў увагу, што ў сродках масавай інфармацыі пастаянна «нарастае гэтая брахня», якая звернутая ў бок Беларусі. «Ім патрэбныя грошы. Ні тры балтыйскія дзяржавы, былыя рэспублікі Савецкага Саюза, ні Польшча не валодаюць дастатковай сілай, каб задаволіць свае хацелкі. Асабліва ў ваеннай галіне. Як Польшча — закупляе танкі, іншыя ўзбраенні, якія сёння не танныя. Дроў для насельніцтва няма, а танкі і іншую ваенную тэхніку закупляць трэба», — сказаў беларускі лідар.