Прэзідэнт падпісаў указ аб аб’яўленні 2026-га Годам беларускай жанчыны. Як падкрэсліла Наталля Паўлючэнка, гэта рашэнне напоўнена глыбокім сэнсам і павагай да той ролі, якую жанчына адыгрывае ў жыцці краіны. 

«Беларуская жанчына — гэта перш за ўсё працаўніца. Тая, хто не чакае асаблівых умоў, а проста робіць: клапоціцца, вырашае, падтрымлівае, стварае, а таксама выхоўвае. Менавіта ў сям’і, дзякуючы маці, закладваецца падмурак будучыні: таго самага моцнага, добрага і працавітага пакалення, якое будзе будаваць заўтрашнюю Беларусь. Як дакладна сказаў кіраўнік дзяржавы ў навагоднім звароце: „Без любові да жанчыны сапраўднай любові быць не можа!“ І гэта адчуваецца ва ўсім: ад утульнасці ў доме да атмасферы ў калектыве», — акцэнтавала кіраўнік ведамства.

Для сацыяльнай галіны год асаблівы. «Гэта час нашых прыярытэтаў — сям’я, праца, клопат. Таму што сацыяльная абарона - па сутнасці, жаночая работа ў маштабе ўсёй краіны. Большасць работнікаў — жанчыны. Іх прафесія — гэта працяг той самай натуральнай ролі: быць апорай для слабога, памочнікам для таго, хто жыве ў нястачы, падтрымкай для таго, хто ў цяжкай жыццёвай сітуацыі», — падагульніла Наталля Паўлючэнка.