Канферэнцыя, арганізаваная бялградскім Інстытутам палітычных даследаванняў, расійскім Міжнародным фондам духоўнага адзінства народаў, Архівам аўтаномнага края Ваяводзіна пры падтрымцы шматлікіх партнёраў, прайшла ў Рускім доме ў Бялградзе. У прывітальным звароце да ўдзельнікаў Сяргей Маліноўскі падкрэсліў важнасць мерапрыемства і яго тэматыкі ў цяперашні перыяд узрастаючых спроб перапісаць гісторыю, вечнае значэнне для Беларусі захавання памяці аб Другой сусветнай вайне і яе ўроках. Ён адзначыў сумесныя з саюзнікамі, партнёрамі і аднадумцамі на міжнароднай арэне намаганні па абароне гістарычнай праўды і недапушчэнні адраджэння нацызму. 

Дыпламат падкрэсліў, што Рэспубліка Беларусь нязменна прытрымліваецца курсу беражлівых і аб’ектыўных адносін да гісторыі, абапіраючыся на бясспрэчныя і дакументальна пацверджаныя факты. Адзначыўшы вялікія ахвяры, панесеныя беларускім народам у час нацысцкай акупацыі, беларускі дыпламат праінфармаваў аб расследаванні Генеральнай пракуратурай Беларусі крымінальнай справы аб генацыдзе беларускага народа ў час Вялікай Айчыннай вайны, пацверджаных вывадах аб тым, што маштабы трагічных падзей таго перыяду былі намнога шырэйшыя, чым меркавалася раней.

Ён адзначыў, што ў Беларусі асаблівая ўвага ўдзяляецца таму, каб аб гістарычнай праўдзе, цане перамогі над нацызмам і фашызмам як мага больш ведала маладое пакаленне.

У ходзе адкрыцця канферэнцыі да яе ўдзельнікаў таксама звярнуўся віцэ-спікер Народнай скупшчыны Рэспублікі Сербія. Канферэнцыя сабрала гісторыкаў, палітыкаў, дыпламатаў і грамадскіх дзеячаў з Сербіі, Расіі, Беларусі, шэрага іншых краін. З дакладамі на форуме ў тым ліку выступілі прадстаўнікі Інстытута гісторыі Нацыянальнай акадэміі навук Беларусі і — па відэасувязі — Беларускага дзяржаўнага музея гісторыі Вялікай Айчыннай вайны.