«Усе пытанні на ўзроўні кіраўніка дзяржавы і ўрада нашай краіны вырашаны. Цяпер самае галоўнае, як і казаў Прэзідэнт, — дысцыпліна на месцах. Мы прыцягнулі дадаткова людзей, падрыхтавалі збожжаўборачныя камбайны і зернеачышчальна-сушыльныя комплексы, ёсць паліва для ўборкі. Таму цяпер патрэбна толькі дысцыпліна на месцах. Гэта датычыцца кожнага — ад рабочага да кіраўніка гаспадаркі і старшыні райвыканкама», — сказаў Юрый Горлаў. У сваю чаргу, падкрэсліў ён, Міністэрства сельскай гаспадаркі павінна стварыць усе ўмовы для ўборкі з тэхналагічнага пункту гледжання. 

Як адзначыў кіраўнік Мінсельгасхарча, сёлета ўраджай плануецца не меншы за рэкордную адзнаку, дасягнутую ў 2025-м. Пры гэтым, дадаў ён, надвор’е нязначна ўплывае на вынікі, таму што падрыхтоўка да пасяўной будучага года пачынаецца яшчэ ў папярэднім. «Мы ўжо цяпер плануем, як і што атрымаем у 2027 годзе, на што зробім стаўку. Глядзім, якія культуры добра праявілі сябе на працягу многіх гадоў. У прыватнасці, зерне кукурузы: сёлета мы павялічылі пасяўныя плошчы (пад культуру. — Заўв. БелТА). Гэта вельмі тонкае планаванне, якое ідзе на ўсіх узроўнях дзяржаўнай улады і сельскагаспадарчых прадпрыемстваў, дае свой вынік», — рэзюмаваў Юрый Горлаў.