Наша краіна заўсёды ганарылася сваімі дасягненнямі ў галіне кніжнай індустрыі, яе карані ляжаць глыбока ў стагоддзях. Гэта і работы Ефрасінні Полацкай, першыя ва Усходняй Еўропе вячэрнія кнігі, створаныя Францыскам Скарынам і яго паслядоўнікамі Іванам Фёдаравым і Пятром Мсціслаўцам. Сёння Беларусь мае прызнаную школу мастакоў-графікаў, паліграфістаў і дызайнераў, праслаўленых аўтараў, каб ствараць шэдэўры кніжнага мастацтва і атрымліваць самыя прэстыжныя сусветныя ўзнагароды. На палях XXXIII Мінскай міжнароднай кніжнай выстаўкі ў пятніцу, 20 сакавіка, аб’явілі пераможцаў 65-га Нацыянальнага конкурсу «Мастацтва кнігі». Карэспандэнты «Звязды» пабывалі на ўрачыстым мерапрыемстве.

Старшыня журы нацыянальнага конкурсу «Мастацтва кнігі», намеснік міністра інфармацыі Дзяніс ЕЗЕРСКІ адзначыў, што над кожнай кнігай акрамя самога аўтара працуе вялікая колькасць спецыялістаў — майстроў сваёй справы. Кожная кніга, якая была прадстаўлена на конкурс і якая атрымала заслужаную ўзнагароду, на яго думку, з’яўляецца эталонам, узорам тэхнічнага выканання, класічнага выканання кнігі. «Гэтыя кнігі павінны быць у кожнай бібліятэцы, у кожным доме. Па гэтых кнігах трэба вучыцца адкрываць нашу краіну», — падкрэсліў Дзяніс Езерскі.

Можна выдаць кнігу вельмі хутка і лёгка, але ці застанецца яна ў памяці і захаваецца на стагоддзі, гэта вельмі вялікае пытанне, сказаў намеснік міністра інфармацыі. «Таму ўсім прысутным я рэкамендую пастарацца ўзяць кнігі ў рукі, пагартаць, пранікнуцца і атрымаць асалоду ад таго, што вы трымаеце; падумаць, колькі сіл, працы і часу ўкладзена ў іх вытворчасць. Кнігі на самай справе гэтага вартыя».

Гран-пры «Трыумф» 65-га Нацыянальнага конкурсу «Мастацтва кнігі» атрымала выданне «Час выбраў» Выдавецкага дома «Звязда». Спецыяльны дыплом у намінацыі «Трыумф» — у выдання «Спадчына Беларусі. Храмы. Наследие Беларуси. Храмы» Аляксандра Аляксеева і Алега Лукашэвіча (выдавец Аляксандр Аляксееў).

Што датычыцца кнігі «Час выбраў», Дзяніс Езерскі адзначыў, што акрамя якаснай падрыхтоўкі ўсяго матэрыялу, гэта яшчэ і вельмі важная ідэалагічная кніга, якая сабрала ў сябе важны адрэзак станаўлення нашай краіны. «І ў гэтай кнізе чытач знойдзе вельмі годна прадстаўленыя матэрыялы з газет аб самых важных падзеях», — запэўніў намеснік міністра інфармацыі.

Гэтае выданне — рэтраспектыва станаўлення і развіцця беларускай дзяржаўнасці ў перыяд суверэнітэту і незалежнасці нашай краіны. У аснову кнігі пакладзены праект Выдавецкага дома «Беларусь сегодня» «Час выбраў». У красавіку 2025 года на аснове гэтага ўнікальнага праекта Выдавецкім домам «Звязда» быў падрыхтаваны і выпушчаны 448-старонкавы фаліянт. У аснову яго зместу былі пакладзены матэрыялы цэнтральнай перыёдыкі краіны за 1994—2025 гады, а гэта — больш за 20 тысяч выпускаў пяці газет. Аўтары кнігі паказалі, як Беларусь прайшла шлях ад складанага перыяду станаўлення да сучаснай высокатэхналагічнай дзяржавы, а таксама пазначылі ключавыя этапы развіцця і ролю інстытута прэзідэнцтва ў развіцці краіны. 

Дырэктар — галоўны рэдактар Выдавецкага дома «Звязда» і сааўтар кнігі Вольга АНУФРЫЕВА ў размове з журналістамі расказала, што атрымліваць галоўную ўзнагароду конкурсу вельмі хвалююча: «Як сёння было сказана, гэта экзамен, які паліграфісты і выдаўцы здаюць за год. Вядома, прыемна быць не проста ў ліку першых, а першым. Гэта акрыляе і натхняе на новыя ідэі».

Журналіст Выдавецкага дома «Беларусь сегодня» і сааўтар кнігі Максім ОСІПАЎ адзначыў, што кніга з’явілася ў выніку плённага журналісцкага супрацоўніцтва — Выдавецкага дома «Звязда» і Выдавецкага дома «Беларусь сегодня». «Нягледзячы на тое, што аўтарамі лічацца два чалавекі, два прозвішчы, насамрэч, над ёй працавалі некалькі дзясяткаў чалавек. Наша кніга — гэта свайго роду „таблетка для памяці“. Гісторыя ведае дзясяткі выпадкаў, калі квітнеючая дзяржава ператваралася ў хаос, кроў і хлам. Адваротных прыкладаў вельмі мала. Беларусь — адзін з такіх!»

Яна ВАЛАСАЧ
Фота Лізаветы ГОЛАД