Днём 28 лістапада гродзенскаму школьніку патэлефанаваў невядомы. Мужчына цікавіўся фінансавым становішчам бацькоў дзіцяці. Хлопчык расказаў, што грошы ў сям’і маюцца, і ён ведае, дзе яны захоўваюцца.

Пасля гэтага ашуканцы сталі запалохваць 11-гадовае дзіця, пагражалі яго бацьку турмой. Пры гэтым сказалі, што трэба праверыць сапраўднасць купюр, і калі грошы акажуцца сапраўднымі, яны праз час іх вернуць. Усе размовы з непаўналетнім былі строга канфідэнцыйнымі, хлопчыку забаранілі каму-небудзь расказваць пра іх. У дзень, калі бацькі былі на працы, ашуканцы зноў выйшлі з ім на сувязь, паведамілі кодавае слова «зіма», і той стаў чакаць кур’ера, якому і перадаў зберажэнні сям’і — больш за Br82 тыс.

На месцы здарэння працавала следча-аператыўная група. Бацька непаўналетняга расказаў, што яму было невядома пра тое, з кім кантактаваў сын напярэдадні. Пры гэтым адзначыў, што папярэджваў дзіця аб ашуканскіх схемах.

Супрацоўнікі міліцыі аператыўна ўстанавілі асобу кур’ера. Ім аказаўся 21-гадовы замежнік, які прыбыў у Беларусь незадоўга да гэтага. Па шляху руху ў сталіцу ён быў затрыманы праваахоўнікамі. Усе грашовыя сродкі знаходзіліся пры ім, яны канфіскаваныя. У будучыні грошы будуць вернутыя законнаму ўладальніку.

Падчас допыту падазраваны расказаў следчаму, што знайшоў падпрацоўку кур’ерам праз Telegram. Заказчык праінфармаваў яго, што неабходна выязджаць на названыя адрасы, дзе яму будуць перадаваць грошы, а яго работа будзе заключацца ў іх наступным перамяшчэнні. Пры гэтым першапачаткова хлопцу сказалі, што атрыманыя сродкі — выйгрышы ў казіно.

Гродзенскім міжраённым аддзелам Следчага камітэта ў дачыненні да 21-гадовага замежніка заведзена крымінальная справа па ч. 4 арт. 209 КК (махлярства, учыненае ў асабліва буйным памеры). Зараз з удзелам падазраванага праводзяцца следчыя дзеянні.