За некалькі дзён ваеннаслужачыя Гродзенскай пагранічнай групы выявілі ў пунктах пропуску тры факты незаконнага перамяшчэння праз граніцу радыёкіраваных мадэляў і беспілотніка.
У пункце пропуску Бераставіца 29 жніўня пагранічнікі затрымалі беларуса. Ён спрабаваў завезці з Польшчы авіямадэль, набытую за мяжой.
Праз суткі аналагічную спробу распачаў грамадзянін Германіі ў пункце пропуску Брузгі. У салоне яго аўтамабіля знойдзены беспілотны лятальны апарат, пульт кіравання да яго і элементы сілкавання. У гэтым жа пункце пропуску 1 верасня пагранічнікі прадухілілі яшчэ адну спробу ўвозу ў краіну авіямадэлі. Гэтым разам дадому з «цацкай» вяртаўся грамадзянін Беларусі.
Ва ўсіх выпадках прадметы канфіскаваныя. У дачыненні да мужчын распачаты адміністрацыйны працэс паводле часткі 1 артыкула 18.38 КаАП Рэспублікі Беларусь (незаконныя дзеянні ў дачыненні да грамадзянскіх беспілотных лятальных апаратаў і авіямадэляў). Парушальнікам пагражае штраф да 30 базавых велічынь (1350 беларускіх рублёў).
З пачатку года гродзенскія пагранічнікі спынілі 11 спробаў увозу ў краіну беспілотных лятальных апаратаў.
Нагадваем, што ў адпаведнасці з Указам Прэзідэнта Рэспублікі Беларусь № 297 ад 25 верасня 2023 года фізічным асобам забаронены ўвоз на тэрыторыю Рэспублікі Беларусь, захоўванне, абарот, эксплуатацыя і выраб грамадзянскіх беспілотных лятальных апаратаў і авіямадэляў, а таксама выкарыстанне паветранай прасторы грамадзянскімі БЛА.
Данііл ХМЯЛЬНІЦКІ
Фота ДПК
