«Мы бачым, наколькі важна займацца захаваннем гістарычнай памяці, патрыятычнай працай. У Кузбасе гэтая праца таксама праводзіцца, але мы мала бываем на іншых тэрыторыях. Таму мы скарыстаемся запрашэннем пабываць у памятных месцах Беларусі. Са свайго боку, чакаем турыстаў на нашых гарналыжных схілах: у нас вельмі доўгі сезон. Колькасць турыстаў з Беларусі павялічваецца, і мы іх чакаем», — заявіў губернатар Кемераўскай вобласці.

Ён расказаў аб планах пабудаваць недалёка ад пасёлка Шерегеш, які вядомы сваім гарналыжным курортам, новы аэрапорт. «У нас ёсць перспектывы адкрыцця прамых авіярэйсаў, якія б дастаўлялі аматараў гарналыжнага адпачынку ў Кузбас», — лічыць Ілля Серадзюк.

Нягледзячы на тое, што Ілля Серадзюк упершыню наведаў Беларусь, з краінай і многімі яе грамадзянамі ён знаёмы вельмі добра, бо бакі даўно і цесна супрацоўнічаюць у сферы прамысловасці.

Гаворачы аб уражаннях, якія ў яго пакінула знаходжанне ў Беларусі, губернатар Кузбаса адзначыў развіццё інфраструктуры і дагледжанасць гарадоў. Асаблівую ўвагу — і нездарма — ён звярнуў на добраўпарадкаванне памятных месцаў і ваенных пахаванняў.

На сустрэчы з Прэзідэнтам Беларусі Ілля Серадзюк падзяліўся сямейнай гісторыяй. Паводле слоў губернатара, у ваколіцах вёскі Філіпавічы Мінскай вобласці ў 1942 годзе загінуў яго дваюрадны дзед. Падчас свайго візіту Ілля Серадзюк наведаў гэтую вёску (там знаходзіцца абеліск у гонар воінаў і партызан) і ўшанаваў памяць свайго дзеда і ўсіх савецкіх воінаў, якія аддалі жыццё за Радзіму.

«Па шляху я ўбачыў, колькі помнікаў, мемарыяльных месцаў, проста маленькіх магіл і крыжоў у ахайным стане, наколькі трапятліва мясцовыя жыхары ставяцца да зместу гэтых месцаў», — расказаў Ілля Серадзюк.